PAMPHILIE.
Esclave volontaire, & timide flateur,
Qui mesme des deffauts te rends adorateur,
J'ay honte de penser à la bassesse infame
Qui pour un faux bonheur te fait trahir ton ame,
Au lieu de te flatter d'un credit si puissant
N'avance qu'avec peur dans un pas si glissant,
Aux pieds des grands Rochers sont les grands precipices,
Et souvent le regret suit de prés les delices.
Plaints au lieu d'admirer ces presents criminels,
Qui te vont procurer des malheurs eternels,
Et d'un coeur genereux rejette cette pompe
Dont le funeste esclat vous seduit & vous trompe,
Ou si tu ne peux pas detacher tes desirs
De ces honteux honneurs, de ces lasches plaisirs,
Adore si tu veux la chaine qui te lie,
Mais voicy les liens que cherit Pamphilie.
Liens que tu devrois comme moy desirer,
Et soubs qui nous serions trop heureux d'expirer.
Ouy, voila mon espoir, voila ma recompence,
Accorde les, Cesar, à mon impatience,
Et par ce beau present que tu dois à mes voeux
Tu feras plus pour moy que tu n'as fait pour eux.
Je suis Chrestienne.
LUCIANE.
Helas!