XIII.
ANNEE 1185.
Coment le roy leva le duc de Bourgoingne du siège du chastel de Vergy qu'il avoit assis.
En dementiers que ces choses avindrent, Hue de Bourgoingne assembla son ost et assist un chastel qui est appelé Vergy; si siet aux derrenières contrées de sa terre[39]. Quatre chastiau fist fermer tout environ que l'on nomme barbacannes[40]. La raison pourquoy il assist ce chastel estoit telle que il disoit qu'il appartenoit à sa seigneurie et à son fief, et jura que par nulle paction né par nulle offre que l'en lui féist ne s'en partirait du siège, jusques à tant qu'il l'eust par force pris ou qu'il luy seroit rendu à sa volenté.
Note 39: «In extremis terræ suæ finibus.» (Rigord.)
Note 40: Vergy étoit près d'Autun. «Et quatuor munitiones in circuitu firmaverat.» (Id.)
Quant le sire de ce chastel qui avoit nom Guy vit le ferme propos le duc, et qu'il s'appareilloit en toutes manières du chastel prendre, il envoia au roy et luy manda par lectres toutes ses besoingnes. Le mandement estoit tel qu'il luy prioit pour Dieu qu'il venist là, et il luy rendroit et doneroit le chastel perpétuellement à luy et à ses hoirs. Quant le roy eut entendu la lectre, il fist son ost assembler, et se hasta moult pour délivrer le souffroiteux des mains de plus fort de luy. Si soudainnement se féri en l'ost le duc, que luy et sa gent furent ainsi comme surpris. A tant fu levé le duc du siège que il avoit juré qu'il n'en partiroit si auroit le chastel pris. Lors fist le roy abatre les barbacannes que le duc avoit environ fermées. Gui le sire du chastel receut le roy dedens, et luy rendi à sa volenté si comme il luy avoit mandé. Le roy le receut si comme le sien propre, garnison y mist de par luy, si en accrut de tant son propre fief en ces parties.
En pou de temps après celluy Gui fist hommage au roy, et jura que tousjours seroit loial à la couronne de France; et le roy de sa débonnaireté et largesce luy rendi le chastel entièrement et toutes les appartenances; mais en tant contint sa largesce qu'il en retint la seigneurie.
Incidence.—En ce temps fu éclipse de soleil particulaire, le premier jour de may en l'heure de nonne: si estoit le soleil au signe de Torel.