XXVII.
ANNEE 1241.
Coment le roy fist Alphons, son frère, chevalier.
L'an de grace mil deux cens et quarante et un, assembla le roy à Saumur grant plenté d'archevesques, d'évesques, d'abbés et des barons de son royaume, et fist messire Alphons son frère chevalier: et si luy donna à femme la fille au conte de Thoulouse, et la contrée de Poitiers, d'Auvergne et d'Albigois. Les barons et les chevaliers firent grant feste et furent vestus de samit et de soie. Quant la feste fu passée, le roy requist le conte de la Marche que il fist hommage à son frère pour la terre qu'il tenoit en Poitou. Mais le conte qui se fioit au roy d'Angleterre, pour ce qu'il avoit sa mère espousée, refusa à faire hommage au conte de Poitiers; et tout ce fist-il par le conseil de sa femme, et dist que jà ne tendroit riens de luy jour de sa vie.
Quant le roy vit la contenance au conte de la Marche orgueilleuse et fière, si en fu moult couroucié. Il se parti d'ilec et s'en vint à Paris. Si comme il fu entré en sa chambre, nouvelles luy vindrent que la royne avoit eue une fille qui eut nom Ysabiau.