TRADIMENTI
—La xe stada cussì:[1] lu me ga dito:
«Che anzoleto! che splendidi cavei!»
Mi go risposto: «El diga, el tira drito
Per la so' strada!..» E lu: «Che ocioni bei!»
Po mi go dito: «Nol se toga impasso[2]
Co le tose onorade» e ò slongà 'l passo….
Lu, a tradimento, un baso el m'à sćiocà….[3]
Mi, a tradimento, un sćiafo go molà!…[4]—
[1] la xe 'ndada cussi = l'andò così.
[2] nol se toga impasso = non si prenda libertà.
[3] sćiocà = schioccato.
[4] sćiafo go molà = gli lasciai andare uno schiaffo.