SCENA NONA
Tittariello da destra e detti.
Tittariello
(facendosi largo tra la folla)
Neh, pe favore, 'a quinta sezzione addo' sta?
Donn'Emilia
(avanzandosi)
Ched'è, neh Tittarié?
Tittariello
'Onna Cuncetta ha perzo 'o fazzuletto 'e seta llà dinto.
Donn'Emilia
Eh! E mo nne trove dduie!
Pesce
(indicando la 5.ª Sezione a Tittariello)
Lì, lì, dimandate all'usciere.
Tittariello
(facendosi largo davanti alla 5.ª Sezione)
Neh, premettete, premettete! (entra là dentro).
Assunta
(a Ernestina, sottovoce)
Quann'esce chillo 'a llà dinto spiale si Michele sta ancora abbascio.
Ernestina
Abbasta ca nun mme fa quacche parte!
(Tittariello esce dalla 5.ª Sezione)
Assunta
(a Ernestina, spingendola)
'O ì lloco!...
Tittariello
(allegramente, col fazzoletto di seta in mano, mostrandolo a donn'Emilia)
Aggio truvato 'o fazzuletto! 'O teneva l'usciere...
Ernestina
Siente, Tittarié!... (Tittariello si ferma e si volta) 'On Michele sta ancora abbascio?
Tittariello
Sta dint' 'a cammera d' 'e carrubbiniere.
Ernestina
Ah?... (a Assunta, sottovoce) Avite ntiso?
Tittariello
(vedendo Assunta)
Avisseve scennere abbascio, mo? Nu 'scennite. Si no facite succedere 'o quarantotto!...
Assunta
'A mamma sta pure abbascio?...
Tittariello
Chi? Chella pare 'a Vergene d' 'e sette spate!
Donn'Emilia
Puverella!
Tittariello
E mo c'ha ntiso c'a don Michele nn' 'o manneno fora ll'è benuto comme si fosse n'inzurto!...
(Federigo s'accosta a udire)
Assunta
(tremante, balbettante)
Chi?... Addo'?... Fora?...
Tittariello
Ha ditto 'o marisciallo d' 'e carrubbeniere c'a Santa Maria Apparente e ncoppa S. Efremo nun ce stanno cchiù poste. Tutte 'e cundannate d'ogge vanno 'Avellino...
Una voce da lontano
Tittarié!...
Tittariello
Oì ccà!... L'aggio truvato!... Neh, premettete... (via in fretta, gridando) Ll'aggio truvato!...
(Pesce indica a Tina la 5.ª Sezione e vi si avviano)