Item den oder dem ersten, der do prengt zu dem fewer der karren mit feurschaffen ein, [die] in den hutten steen in der stat, gibt man sechtzig pfenning.
Item den oder dem andern, die also mit einem karren mit fewerschaffen komen, dreissig pfenning.
Item dem schaffer und anschicker von aller seiner müe, als da vorn steet, vierundzweintzig pfenning.
Item den thurnern auf sant Seboltz und sant Laurentzen thürnen, wo die anschlagen die sturm glocken, auf ieden thurn zwelf pfenning.
Item den gesellen, die die fewermeister bestellen, das sie des nachtz pei dem fewer piß an den tag beleiben, als da vorn steet, iedem zwelf pfenning.
Item einem ieden meister von steinmetzen, zimmerman und badern, die pei dem fewer gewesen sein auch redten haben helfen thun, gibt man zwelf pfenning.
Item einem zimmergesellen, steinmetzen gesellen, statknechten, pütteln, [patknechten] und andern, die also bei dem fewer arbeitten und gearbeit haben dopei, gibt man iedem sechs pfenning.
Item was dann den badern von schaffen abget, die verloren, verprunnen oder abgangen weren, die zalt man in, was der meister im selben pat spricht, das ir auß seiner stuben zu dem fewer pracht worden sei, [ie fur ein groß schaff drei pfenning, fur ein kleins zwen pfenning].