von des slages krefte ‖ der wert vil lûte erhal. 10
het er sîn swert enhende, ‖ sô wær ez Hagnen tôt.
sêre zurnde der wunde: ‖ des twanc in êhaftiu nôt.
Erblichen was sîn varwe: ‖ ern mohte niht gestên
sînes lîbes sterke ‖ muoste gar zergên,
wand er des tôdes zeichen ‖ in liehter varwe truoc
sît wart er beweinet ‖ von schœnen vrouwen genuoc.
Dô viel in die bluomen ‖ der Kriemhilde man:
daz bluot von sîner wunden ‖ sach man vaste gân.