Der künec von Burgonden ‖ klagte ouch sînen tôt.
dô sprach der verchwunde ‖ ‘daz ist âne nôt,
daz der nâch scaden weinet, ‖ der in dâ hât getân.
der dienet michel schelden: ‖ ez wære bezzer verlân.’
Dô sprach der grimme Hagne ‖ ‘jan weiz ich waz ir kleit.
ez hât nu allez ende an uns, ‖ sorge unde leit:
wir vinden ir nu wênic ‖ die getürren uns bestân.
wol mich daz ich des heldes ‖ hân ze râte getân.’
‘Ir muget iuch lîhte rüemen,’ ‖ sprach hêr Sîfrit.