Judas tegegnes ‖ endi te themu godes barne
hnêg mid is hôƀdu ‖ endi is hêrron quedde,
custe ina craftagne ‖ endi is quidi lêste,
uuîsde ina themu uuerode, ‖ al sô he êr mid uuordun gehêt
That tholode al mid githuldiun ‖ thiodo drohtin,
uualdand thesara uueroldes ‖ endi sprak imu mid is uuordun tô,
frâgode ine frôkno: ‖ ‘behuî kumis thu sô mid thius folcu te mi,
behuî lêdis thu mî sô these liudi tô ‖ endi mi te thesare lêðan thiode
farcôpos mid thînu kussu ‖ under thit kunni Judeono,
meldos mi te thesaru menegi?’ ‖ Geng imu thô uuið thea man sprekan,