Hagne der was meister: ‖ des fuorter ûf den sant
vil manegen zieren recken ‖ in daz unkunde lant.
Zem êrsten brâht er übere ‖ tûsent rîter hêr,
dar zuo sîne recken. ‖ dannoch was ir mêr:
niun tûsent knehte ‖ fuort er an daz lant.
des tages was unmüezic ‖ des küenen Tronjæres hant.
‘Nu enthalt iuch,’ sprach Hagne, ‖ ‘ritter unde kneht.
man sol vriunden volgen: ‖ jâ dunket ez mich reht.
vil ungefüegiu mære ‖ diu tuon ich iu bekant: