Nû nâhent ez dem strîte. ‖ der helt ûz Sturmlant
begunde ein horn blâsen, ‖ daz manz über sant 10
wol von sînen kreften ‖ hôrte drîzic mîle.
die von Hegelingen ‖ begunden zuo dem Hilden zeichen îlen.
Dô blies er ander stunde. ‖ daz tete er umbe daz,
daz iegelîcher recke ‖ in den satel saz
und daz si ir schar schikten ‖ dar si wolten kêren.
man gevriesch in den strîten ‖ nie alten recken alsô hêren.
Er blies ze dritten stunden ‖ mit einer krefte grôz,
daz im der wert erwagete ‖ und im der wâc erdôz.