erglasten in die helme. ‖ jâ was ouch Hartmuot dâ niht eine.
Dô sach man Hartmuoten ‖ rîten vor der schar.
ob er ein keiser wære, ‖ sô kunde er nimmer gar 10
vlîziclîcher werben. ‖ ez lûhte gên der sunnen
allez sîn gewæte. ‖ im was noch hôhes muotes unzerunnen.
Dô hete Ortwînen ‖ Hartmuot erkorn.
swie er sîn niht erkande, ‖ doch houte er mit den sporn
sîn ros, daz spranc vil wîte. ‖ er reit ûf Ortwînen.
ir sper si neigten bêde: ‖ dâ von man sach liehte brünne erschînen.