Wissenschaftliche Mittheilungen.
Ordnung des Dompropsts Kilian von Bibra, des Dechants Mertein von der Kere und des Domkapitels zu Würzburg für die Stadt Karlstadt.
Mitgetheilt von Dr. C. Will.
Wir Kilian von Bibra in geistlichen rechten Doctor, Thumprobst Mertein von der kere Techant vnd das Capitel des Thumestiffts zu Wirtzpurg. Als in kurtz vergangener Zeit, etweuil Irsals geprechen vnd Zwittrecht In vnser Stat karelstat zwischen vnsern lieben, getrewen, dem Rathe vnd gemeyns mannen doselbst erwachssen vnd auferstanden sind derhalben vnnsere vorfarn vnd auch wir vmb guter dinge, frids eynigkeit vnd gemeyns nutzs, willen vermelter vnser Stat zum offtern male gehandelt ordenunge vnd satzung des Regiments zwischen Rate vnd gemeynde gemacht vnd letzst bey dem Erwirdigen Herrn Ludwigen vom Weyers seiligen vnnserm Thumtechant, vmb gemeynes nutze vnd eynigkeit willen gemeiner vnser Stat zwen Rethe einen Innern vnd einen eussern Rathe mitsampt einer ordenunge wie sie regiren vnd sich gein einander halten solten nach laut vnd Inhalt zweier besigilter brif die wir denselben zweyen Rethen vnter vnnserm des Capitels anhangenden Insigele gleichs lauts geben gehabt die in Irem besluſs vnter anderm In sich gehalten haben, das vns vnd vnsern nachkomen am Capitel als Iren rechten herren darInn vorbehalten gewesen dieselben ordenunge vnd satzung zu meren zu myndern zu bessern gantz ab zuthun vnd newe zu machen etc. Wan aber solich vnser vnd vnser vorfarn ordenunge vnd satzung auch schrifftlich, vnd müntlich gutlich vnterrichtung zwischen den vnnsern obgemelt, noch biſshere nicht vast fruchtbar gewesen oder zu gemeynem nutze vermelter vnser Stat fride vnd enigkeit gedynet hat, Sunder dieselben zwen Rethe sind ye mere, vnd mere zu widderwillen komen Also das Ir clage zu mermalen fur vns In ein Capitel erschollen ist vnnd gelanget hat, die vns dermassen zu hertzen gangen bewegt vnd vrsache gegeben handt, das wir derhalben die Erwirdigen vnd wirdigen Herrn Mertein Thumtechant, vnd Balthasar von der kere geuettern Heinrichen vom Lichtenstein vnd Jorgen von Seckendorff Rinhofen genant vnnsere mittumherrn zu Ine gein karelstat gefertiget vnd geschickt haben, dieselben zwen Rethe In Iren geprechen vnd hendeln geineinander nach aller notturft zuuerhoren. vnd die stucke aufzuzeichen vnd wie sie dieselben durch gute mittel nicht vertragen möchten an ein Capitel zubringen vnd gelangen zu lassen. vnd nachdem aber die obgemelten gesanten vnserer herrn vnd frunde beyde Rethe in bey wesen vnser Amptleuthe zu karelstat gnugksamlich geineinander verhört auch Ire geprechen, clage vnd antwort schrifftlichen verzeichent, vnd der mittel dodurch sie In Irem Regiment nach laut vorgemelter verschreibung vnd annder vntterrichtung Ine von vns vnd den vnnsern gescheen In fride vnd eynigkeit zu pleiben nicht finden möchten wan sie von beyden Rethen denselben geschickten vnseren herrn vnd frunden souil zuerkennen geben haben, das Ir Regiment bey einander nicht besteen Auch für die Herschafft vnd gemeyner Stat, die lenge nicht nutze oder fruchtpar sey vnd daruff bitlichen begert das wir sie beiderseit Irer pflicht von Rats wegen getan ledig sagen vnd ein newerung des Rats ordnen vnd machen wollen das aber die vergemelten vnser herre der Techandt vnd andere vnnsere mit tumherrn nit haben annemen wollen, Sonder solich Ire geprechen vnd zwittrecht mitsampt Irer bethe das mañ sie vrlauben vnd des Rats pflicht ledig sagen solle an ein Capitel zubringen Als sie vns dañ in einem mechtigen Capitel gnugsamliche relacion dauon getan haben. Wan wir aber in semlichen gebrechen zwittrechten vnd fürbringen beider Rethe nicht brufen oder befinden, das einicher teyle noch zur zeit sich vergriffen oder in eyniche weis gehandelt habe das Ime zu verweisen stee oder in vneren nachredlichen sey Sonder allein das ein argkwenigkeit haſs vnd widerwille zwischen dem Innern vnd ewssern Rathe swebe vnd entsprungen sey der sich wo der nicht verkomen würde, von tage zu tage eüffen meren vnd in einen mercklichen schaden vnd vnrathe der Herschafft vnd gemelter Stat komen vnd wachssen mochte. Nu wir aber auſs gantzem vnnserm gemute vnd willen So ferre wir konnen vnd mogen geneigt vnd geflissen sind fride Süne vnd einigkeit zu machen vnd wes den vnnsern zu nutze vnd fromen komen vnd an Irem zunemen eren vnd guts erspriſslichen sein solte zu furderen wider willen vnfride vnd argkwenigkeit zustillen vnd abzuschneiden. Vnd demnach domit die vnsern zu karelstat derselben Irer zwittrecht vnd vneynigkeit icht zu grosserm vnrathe oder verdurplickeit Irer narunge fallen Sunder gemeinen nütze vnser vnd der Stat auch Ir selbst dester statlicher gesuchen vnd gefurdern mogen. vnd zu gutem gedeihen pracht werden, vnd das wir vnd vnnser nachkomen vns hinfure gegetrewer dinsthilff vnd beistands so es die notturfft erfordert dester vollkomener zu Ine versehen vnd vertrosten Auch wir sie wider vmb dester fruchtbarlicher mit gnaden versehen schutzen schirmen vnd verteydigen mogen das alles vnd mere dapffer sachen die vns darzu bewegen angesehen Bekennen wir mit diser schrifft fur vns vnd alle vnnsere nachkomen am Cappitel vnd thun kunt allermeniglich das wir mit guter vorbetrachtung vnd zeitlichem vorrathe den wir hirInn gehabt Im aller besten vf das die gemelt vnnser Stat zu besser ordenung vnd regirunge auch gemeiner Stat vnd Inwoner Ere lobe vnd nutze dester groſslicher geprufet vnd gesucht werden moge. Vnd sunderlich merern vnwillen schaden vnd vnrathe So vns vnseren nachkomen vnd der gemelten vnser Stat auſs obgedachtem Irem wider willen erwachssen sein mochte zu verkomen vns vnd den mergedachten vnsern Bürgern vnd vnterthanen zu karlstat Rathe vnd Gemeinde zu nutze vnd zugute haben wir die vorgemelten ordenunge vnd satzunge bey dem vom Weyers gemacht, vnd gegeben getodt, vnd abe gethan Totten vnd thun die wissentlichen abe In crafft dits brifs vnd vnnser oberkeit die wir do haben vnd geben Ine diese hienachgeschriebene newe ordenunge satzung vnd regirunge die wir auch also vestiglich gestrengklichen vnd vnuerprochenlichen von einem igklichen vnnsern burgern vnd Inwonern zu karelstat er sey Im Rathe oder in der gemeinde gehalten haben wollen vnd der bey seinen pflichten vns verwant getrewlichen volge zuthun.
Item vnd nemlichen zum ersten also Setzen ordenen vnd wollen wir das Nu hinfuro doselbst zu karelstat nicht merer dann ein einiger Rathe von zwölf personen sein soll, die wir auch itzunt vff Ir bethlichs vnd gesynnen als sie wie vorgemelt ist vrlaub gefordert han yedoch nit vmb miſshandelung Auch nymant zu smehe oder zu vneren von newem darein gewelet gesetzt, vnd genomen Nemlichen Wolff Plessen Cuntz durren Endres Grünnigk, Contzen Altman Gilgen hoffstetter Clausen Greiffen Peter Schonhart, Hansen Hiltprant, Peter krugk Clausen Ecken Hannsen Scheffer vnd Peter Schrautenbach die alle vnd Ir igklicher besunder einen Rathe von newen globt vnd geswörn haben.
Item vnd ob es sich hinfuro begebe das einer oder merer auſs den genanten zwolffern von tods wegen oder sunst vmb mercklicher vrsache willen auſs dem Rathe abgingen wie das geschicht das got beuolhen sey So sollen vns vnd vnnsern nachkomen am Capitel die andern Im Rathe vier oder sechs tugliche persone auſs der gemeynde verzeichent schicken als von alter herkomen ist auſs den selben, oder andern wir vns vorbehalten die abgegangen personen Im Rathe wider zuerfollen die dann auch globen vnd sweren sollen In massen die andern Im Rathe gethan haben.
Item dieselben zwolff Im Rathe sollen also Jerlich vnd ein ydes Jare besunder allewegen vf des heiligen Creutzs tage Exaltacionis genant, In beywesen vnnsers Schultheissen den wir ye zu zeitten do haben werden, Zwen auſs Ine zu Burgermeistern welen vnd machen vnd dieselben die also Jerlich zu Burgermeistern gesetzt gewelet vnd gemacht werden Auch ein igklicher der In den Rath genomen Wirdet Sollen vnnserm Schultheissen den wir do haben an vnser Stat vnd von gemeiner Stat wegen nach Inhalt des eyds daruber begriffen globen vnd sweren der herschafft vnd Statsachen Ingemein vnd besunder nach Irem besten vermogen vnd verstentniſs zu Rathen zu handeln vnd auſszurichten.
Item auch die Burgermeistere vmb alles vnd igklichs Ir einnemen vnd auſsgeben gros vnd klein nicht auſsgenomen getrewlichen rechnunge thun vnd so Ir Jarzeit vergeet, vf obgemelten des heiligen Creutzstag mit derselben Irer rechnung geschickt sein yedoch das sie vns das zeitlichen vor verkünden mit Irem brife oder kuntlichen boten ob wir vf vermelten Tage die vnsern auch zu Irer rechnung schicken wolten, Wo wir aber ander vnser anligenden sachenhalb vf genanten tage zu solcher rechnunge nicht geschicken mochten, das sie dann Irre rechnunge verzihen auch Irs Ampts nicht ledig sein sollen, biſs vf einen andern tage den wir Ine ernennen vnd die vnsern dobej gehaben mogen von Irem einnemen vnd auſsgeben rechnunge zu horen zu der sie also geschickt sein das sie derselben Irer rechnunge drew Register gleichs lauts machen lassen sollen vns der eins dem Rathe von gemeiner Stat wegen das annder vberantwurtten vnd das drit fur sich behalten.
Item wir setzen ordnen vnd wollen auch das nü hinfure In gemelter vnnser Stat karelstat auſs der gemeynde vier virteillmaister gesetzt, gemacht, vnd sein sollen Als wir die dann auch itzunt gesetzt gemacht, vnd furgenomen haben mit namen Betzen Mergentheim Im Höenecker virteil Hannsen Eisengart Im Rotensteiger virteil Wilhelmen Schmidt Im Multhurner virteil vnd Clausen Renckner Im Rotenhurner virteil, die Itzgemelten vnd andere Ire nachkommen sollen hinfure mitsampt vnnserm Schultheissen den wir itzunt oder hinfure do habenn werden zu allen vnd igklichen rechnungen aller Amptleuthe der Burgermeistere Bethsetzer Gotshauſsmeister Pruderschafft Maister Spitalvberseher etc. Auch zu andern grossen vnd dapffern sachen die Herschafft vnd gemeiner Stat betreffendt als einen Hernzugk einen kostlichen Bawe der Stat, Oder so einer mit gedinge In die bethe doselbst komen oder eindingen oder so der herschafft vnd gemeiner Stat vehde zustunde ein ordenunge der were zu machen, oder die letze zu bestellen Oder so man ein Summ gelts fur die Stat aufbringen solte, das doch anders nit dann wie hernachgeschrieben steet sein soll Oder der gleichen sachen Ratslagen solle allewegen von einem Rate darzu gefordert werden vnd dabey sein vnd wes solcher hendel, notturfft ist an ein gemeinde zu pringen oder gelangen zu lassen das sollen die virteil Maister vf beuelhe vnnsers Schultheissen vnd eins Rats mit einer gemeinde ein yder nach seinem beuelhe an sein virteil darInn er gesessen ist getreulichen anpringen werben vnd Ir meynunge empfahen vnd dann wider In einem Rathe In bey wesen vnnsers Schultheissen eroffnen vnd dann dieselben Sache mitsampt Schultheiſsen vnd einem Rathe nach dem besten helffen Ratstagen nach nütze vnd notturfft der herschafft vnd gemeiner Stat helffen handeln. Aber sunst on beuelhe vnnsers Schultheissen vnd eins Rats kein Gemeinde zu Sammen verpotten in keineweiſs ongeuerde.
Item wir setzen ordenen vnd wollen auch das hinfure weder Rathe oder virteilmeister In gemein oder besunder kein ewige gelt leipgedinge, oder auch sünsten kein Summ gelts weder vil oder wenig bei Iren eyden vnd pflichten vns verwant, fur die gemelten vnser Stat, verkauffen entlehen, oder auſspringen sollen on sunderlichen vnnsern des Capitels küntlichen willen wissen vnd erleubung Sunder ob Ine einiche Summ gelts oder leipgeding die Sie itzunt von Gemeiner Stat wegen Jars zugeben schuldig sind abstürbe vns das bey denselben Iren pflichten zuuerkunden vnd nit zu verhalten.