Nº 3.
März.
Wissenschaftliche Mittheilungen.
Der „fränkische Krieg“.
Mitgetheilt von Jos. Baader, kgl. Archivconservator, in Nürnberg.
(Schluſs.)
Neuen- vnd Alten-Guttenberg die zway schloſser betreffend: Am suntag den fünfften july sind herr Jorg Truchsäs vnd die kriegsräte sambt dem kriegsvolckh für Kulmach bey die zway schloſs Alten- vnd Neuen-Guttenberg gelanngt, darfor denselben schloſsen, so vaſst lustig, veſst vnd wol erpauen gewest, den Guttenbergern zusteendt, durch etliche veintsbriefe absagen laſsen vnd furtter dieselben, wie sich gepürt, erfordert. Aber alda ist niemandt dann etliche edle weiber gefunden, die haben mit cläglichen geperden gnad begeret. denen ist zum tayl gnad wilfart, aber nichts wenigers der widerwerttigen Guttenberger teyl an denselben zweyen schloſsen abgeprochen, das zimmer verprennt vnd nachmals der vest thurm, so im alten schloſs Guttenberg gewest, desgleichen die pasteyen vnd gefengnus auch im neuen schloſs mit pulffer gespickt vnd zersprenngt, das dann den taylen, so gesichert sein sollten, auch mit erschellung des groſsen erpidems des pulffers mercklich schaden zugefügt vnd ire heuser gar zerschüttet hat.
Item Eritags den sibennden july sindt die geordenten haubtleut vnd kriegsrete vor den schloſsen Alten- vnd Newen-Guttenberg aufgebrochen, dieselben nacht zwischen Guttenberg vnd Sparneckh gelegen vnd am mittwoch den achten july für Sparneckh, Waltstain vnd Oprod, so alles nahend beyainander, gelangt, doselbst etlich tage still gelegen.
Gattendorff, ain schlos der Sparnecker vff dem gebirg: In derselben zeit ist von herr Jorgen vnd den kriegs räten gen Gattendorff, so dem Gatt von Sparneckh zugestannden, geordent worden zway vendlin knecht vnd bey hundert raisiger pferde, darunter die Wirttenbergischen, ettlich Bairisch vnd ettlicher stett reuter sambt den stradiotten gewest, daſselb schloſs eintzunemen vnd die thurn vnd pasteyen zusprengen vnd das schloſs alsdann zuuerprennen. Das ist deſselben mals durch die fuesknecht vnd ettlich püxenmaister volbracht vnd wol ausgericht; aber daſselb schloſs ist gar ausgelert vnd niemand darinn funden worden.
Waltstain, ain schloſs der Sparnecker, darauff die gefanngen gelegen, die selbst auskomen sindt durch hilff des almechtigen: Item deſselben tags ist durch Wolffen von Freyburg, einem edlman, so von der statt Augspurg zu haubtmann geordent was, das schloſs Waltstain, so des Wolffen, Cristoffen vnd Jorgen von Sparneckh, gebrüdere, gewest, darauff die gefanngen gelegen vnd auskomen sind, nemlich Johann Lucas N. Lampartter vnd Pamgartner[A], verprennt vnd die gefengnus mit pulfer zersprenngt vnd zerriſsen. Daſselb schloſs ist gar ein mordtgruben vnd nichts erpauen, an einem wilden ortt in einem walde gelegen, vnd nichts darinn gewest.