Die korschuler suͤllen auch einem schulmaister in dem kor helfen singen, wenn er sie fodert, pey sechs hallern.
Avch suͤllen sie mess vnd tagczeit gleich mit einander singen, niht daz ainer sing vnd der ander zu seh, sie suͤllen pey einander vor dem puch sten.
So sol ir dheiner in dem kor in der priester stuͤl niht sten, noch vber dez stifters grab niht lainen.[60]
Avch sol dhein korschuler in den sagrer[61] niht geen on des custers vrlaub, denn[62] die zu der mess ministriren muͤzzen oder der probst, wenn er fragen muz, waz man singen sol.
So sol ir dheiner auf holczschuhen niht gen in die kirchen noch vͦber den ganck vͤber die siechen.
Auch suͤllen die korschuler allweg mit plozzem haupt gen vnd sten in dem kor vnd in den processen von dez heligen creutz tag inuencio auf dez heligen creutz tag exaltacio, pey sechs hallern.
So sol man den korschulern an ainem gepanten tag[63] niht von milch zu ezzen geben, sunder von oͤle.
Avch sol dhein korschuler dhein stechmesser niht tragen newr[64] ein protmezzer, bey sechs hallern von ydem tag.
So sol kein korschuler niht weyter ermel tragen, denn daz moz, daz man in geben hot vnd dheinen offen langen slitz tragen hinten noch vorn in den langen roͤcken.
Vnd suͤllen in dheiner processen keinen kappenczipphel[65] vmb daz haupt niht winden vnd in der kirchen sunderlichen slehticlichen[66] gen als ziemlich ist dez gotzhaus diner. vnd suͤllen auch allweg latein reden in irr stuben vnd in irr slafkamern.