Avch suͤllen sie niht reden mit den fremden mayden, die da wazzer holen von dem prunnen, weder in dem hoff, noch vnter dem tor vnd in der kirchen mit den frawen pilden bey nacht.
Wenn sie am suntag, veirtag drey mess singen oder vier on selmess, daz stet in dem sagrer geschriben vnd an dem puch ffolij.
Avch sol allweg nach der tertz zeit[67] der oberst sacrist vnd der vnter versiculator[68] den hern zu altar ministriren als lang vncz die andern die suppen gezzen haben. Dar nach sol der vnterst sacrist vnd der ander versiculator den priestern zu altar dinen vncz auf die tagmesse.[69]
Vnd der oberst sacrist sol bey dem sagrer pleyben.
Ez sol auch nyemant dheinen sluͤzzel haben zu dem pulpid[70] in dem kor, do die pucher innen ligen denn der custer vnd der oberst sacrist vnd der wochner.
Nota. wo die trew stet, daz suͤllen die korschuler halten bey der trew vnd suͤllen die andern stuck sust halten, wer daz vͦber vert[71] vnd nicht helt, den sol der probst pfenden oder peuchen.[72] Aber[73] der custer vnd der pfleger mugen sie dor vͤmb verkeren.
Wenn ein korschuler seumig ist an der leczen[74] on dez schulmeisters vͦrlaub, den sol der schulmeister ie als off peuchen.
Der schulmeister vnd der probst suͤllen die korschuler dor zu halten, daz sie stille sein, sunderlich ob dem tisch, daz sie allwegen sweigen.
Der schulmaister vnd der probst suͤllen auf den leser merken, der zu tisch list, daz er oͤrdenlich lese vnd niht valsch vnd wenn der schulmeister spricht: Tu autem, so sol der leser aufhoͤren.
Die korschuler suͤllen daz gracias sprechen mit dem schulmeister.