Vnd Caspar Krell soll Im loch bis vff vollziehung der purgschafft ligen bleiben.
[R.-P. 1510, XIII, 18a] Sabato post Oculj (29. März) 1511:
Caspar Krellen freundschafft Soll man ansagen, wo Sy irn Freund Oßwald Krellen zu Lindaw vermugen, so woll man den zusampt Inen vnd des Caspars vater und mutter zu pürgen annemen.
[R.-P. 1511, II, 4b] Secunda post vocem Jocunditatis (26. Mai) 1511:
Caspar krellen bruder sagen Soll morgen wider vmb antwt manen.
[ebenda 5a] Tercia post Vrbanj (27. Mai) 1511:
Caspar Krellen soll man noch (vnentschlossen was enndtlich mit Ime zu handeln sey) allso ligen lassen, vnd dem Brobst Sebaldj schreiben ainen Rate vff der k. Mt schrifft seiner halben zuuerantworten vnd zufurkomen das Ir Mt an ainen Rate ainich weitter Mandata nit außgeen lass denselben Caspar frey ledig zu geben In ansehung was sich ain Rate bey Ime besorgen müß.
Vnd Casparlins freunden Anntwt zu geben ain Rate wöll vff Ir schrifft selber anntwurt geben, vnd dann der angepotten purgschafft halben hab ain Erber Rate Inen vor lawttern beschaid vnd anntwt geben dabey lass es ain Rate bleiben.
[R.-P. 1511, III, 1b] Sabato post corporis Christi (21. Juni) 1511:
Den krellen zu Lynndaw so ytzo Irs Sons vnd brvders halben Caspar krelln geschriben haben antwt zu geben ain Rate hab denselben Caspar deß lebens vff furbitt der fursten vnd gnugsam purgschafft so man ainem Rate verwendt hab gesichert vnd darumb sey ainem Rate Ir angepottne purgschafft alls vngnugsam nit annemlich.