Sie schwetze mir gut — es is alles geloge,
For niemand als Gott macht d’r schee’ Rejeboge!
Horch net uf die G’lernte, loss sie numme schwetze.
Sie roppe dir juscht alles Scheene in Fetze;
Wek, wek mit dem g’scheide Geprall un Gedengel,
Glaab liewer, d’r Boge sei Brick for die Engel!
Eens wees ich g’wiss, dorch ihn dhut Gott kunde
Sei Zeiche der Liewe im ewigen Bunde:
So lang dass der Boge am Himmel dhut schtehe,
Kann nie meh die Erde mit Wasser vergehe!