mit guotem urloube si kômen ûf den sê;
zuo ir vater lande kom diu vrouwe nimmer mê.
Man hôrte ûf ir verte maneger hande spil; A.494
aller kurzwîle der hêten si vil.
ouch kom in zuo ir reise ein rehter waßßerwint.
si vuoren von dem lande: daß beweinde maneger muoter kint.
Doch wolde si den hêrren niht minnen ûf der vart: A.495
eß wart ir kurzwîle unz in ir hûs gespart
ze Wormeß zuo der bürge an eine hôhzît,
dar si vil vreuden rîche kômen mit ir helden sît.