sold ich herverten durch si in drîßec lant,
dâ müese in dienen gerne hin diu Sîvrides hant.‘
Dô sprâchen sîne recken: ‚habet ir der reise muot 703
hin zer hôhzîte, wir râten, waß ir tuot:
ir sult mit tûsent recken rîten an den Rîn:
sô muget ir wol mit êren dâ zen Burgunden sîn.‘
Dô sprach von Niderlanden der hêrre Sigmunt: 704
‚welt ir zer hôhzîte, wan tuot ir mir daß kunt?
obeß iu niht versmâhet, sô rîte ich mit iu dar.
ich vüere hundert degene, dâ mite mêre ich iuwer schar.‘