wande er des tôdes zeichen in liehter varwe truoc.
sît wart er beweinet von schœnen vrouwen genuoc.
Dô viel in die bluomen der Kriemhilde man. 929
daß bluot von sîner wunden sach man vaste gân.
dô begunder schelten, des twanc in grôßiu nôt,
die ûf in gerâten heten ungetriuwe den tôt.
Dô sprach der verchwunde: ‚jâ ir bœsen zagen, 930
waß helfent mîniu dienest, sît ir mich habet erslagen?
ich was iu ie getriuwe: des ich enkolten hân.
ir habt an iuwern vriunden leider übele getân.