„So, warum fehlt denn grad bei mir was? Und bein Schimmiwirt net? Und bei koan Nachbarn net?“
„Dös is de Rohr eahna Sach.“
„I wer scho sehg’n, ob i mir dös g’fall’n lass’n muaß. I woaß scho, was da für a Spitzbuamg’schicht dahinta steckt.“
„Halten S’ Eahna z’ruck, sag i!“
„Und a Spitzbuamg’schicht is, sag i!“
„Sie, passen S’ auf, Eahna kennt ma!“
„Sie kenna mi no lang net, und wenn i net auf da Stell mei Gas kriag, nacha zoag i Eahna, mit wem Sie’s z’thoa hamm!“
„Dös braucht’s net. Eahna kennt ma, sag i. Sie san eine Frau, de wo Insinationa macht. Verstengan Sie? Insinationa!“
„I mach Eahna no ganz was anders, Sie Loawibacha, Sie ausgschamta!“
„Jetzt hab i Eahna! Dös is an Amtsbeleidigung!“