's war zu darer Zeit, wu's noch Schützenfast un Königschießen gob. 's war, wies bei allen is: 's muß allemol Assen un Trinken drbei sei. Un desderwaang gobs aah allemol e richtigs Königsassen. Bei jeden Assen gibt 'rsch welche, die die Gelaanghät net verpassen wolln, emol ellä reden ze könne, weil die anern Leut – mit Respekt ze soong – 's Maul voller hobn un nutgedrunge zuhörn müssen. Esu sei die Trinksprüch aufkomme, die när dan en Nachteil hobn, daß manning Leiten bei dan Gemahr 's Assen drweile kalt werd. Korz un gut – in M. wur nochn Königschießen racht gut gegassen un aah feine Reden wurn drzu gehalten. In darer Sach warn se konservativ: jeds Gahr un jeds Gahr gings noch ener ganz bestimmten Reihefolg. Erscht fing dr Bergemäster aa un hiel ene Red ofn richting König in Drasen. Dann kam dr Virstand vu de Stadtverordneten. Dar hiel sei Red ofn Antritt an neue Schützenkönig. Wenn dar fertig war, stand dr Schul-Bräuer, dr alte Schulgaldkassierer, auf un hiel Gahr für Gahr immer diesalbe Red:
»Meine Herren! Nachdem wir nu ne Antritt von neue König gebührend gefeiert hobn, könne mir aah an Abtritt von alten König net uhne Sang un Klang verbeigiehe; un ich beatroog, daß mer ne e kräftigs Huch ausbränge, daß'r auch in der Verborgenheit wachse, blühe und gedeihe!«
's Pfandgungel.
's gob emol e Zeit – un se is noch gar net esu ewig lang har, wu's of dr deitschen Walt noch Zah-, sugar Zwanzigmarkstückeln gob. Do konnts ab un zu passiern, daß amol ener an Luhtoog su e Goldfüchsel miet drwischet. Bein Rümmler-Dav warsch esu gewesen, dar hatt äs miet ehamgebracht un 's hatten gerod mitn Gald gereicht, daß an Montig bei seiner Selma in dar blachern Cigarettenschachtel, die in dar Familie ne Galdschrank vrtraten tat, dos Goldfüchsel ganz ellä un verlassen log. Se hatten von Sonnohmd har mit Aufwärme gereicht, oder nu mußt doch dr Fläscher wieder har. Der Dav war net drham, dar kam erscht spät an Ohmd vu dr Arbet, do kam zon Ugelick äs ausn Nachberdorf geloffen, wu de Selma harstamme tat, un saht, de Selma söllt geleich nüber zu ihrer Schwaster komme, dä do wollt dr Storch eiziehe. De Selma machet sich zeracht, of ihre Kinner konnt se sich verlossen, die warn aah schie e annermol ellä gewasen. Se saht när noch: »Wenn de kläne Maad aufwacht, do legt'r se treich un fahrt mitr ewing draußen rüm. Dan gieht'r zon Fläscher un kaaft ½ Pfund Rindfläsch un e Pfund Knochen un e Vertel Blutworscht, do lange mer die Woch. Ne Paul (dar war gerod 3 Gahr alt) setzt'r miet in Wong nei. Dann gieht'r zon Weigelbäck un hult e Sechspfünderbrut. Do, ich leg Eich dos Zahmarkstückel har.« Dodermiet machet se fort. De bäden Grußen, dr Willi war elfe un de Cilla zwölf Gahr alt, hobn nu alles genau gemacht, wos de Mutter gesaht hatt. Alles ging schie, när dr Paul machet sei Ding für siech. Dar bläket un war garschtig wie sinst salten. Alles hobn se ne hingabn, daß'r sich beruhiget, oder 's half alles nischt. Do soog'r dos goldne Zahmarkstückel lieng un geleich gings lus: »Dos hoobn iech, dos hoobn iech!« 'r hiel net ehrer Ruh, bis'r endlich sen Kopp dorchgesetzt hatt. De Grußen hobn erscht aufgewaschen un zammegereimt, do krieget of emol mei Paul de Hust esu. Un wie se nachsoong, do wursch net annersch: dr Paul hatt dos Zahmarkstückel verschluckt. O du Ugelück du grußmachtigs!!
Der Willi war dr erschte, dar de Sachlog überschaute. »Esu e Zahmarkstückel is net gruß, dos gieht aah esu miet fort!« Oder de Cilla fing aa ze gammern: »Wos nützt uns dä dos, mir solln doch Fläsch un Brut kaafen!« Bei dan Gebläk war aah de Kläne aufgeweckt un se wur richtig beschickt, dann wur aah dr Paul miet nei in Woong gericht, un dr Willi saht: »Itze machen mer zon Richterfläscher nunner.« De Cilla ging miet un heilet hie un do emol; wie sollt die Sach när zu en guten End komme? – Wie se bein Richterfläscher warn, hub dr Willi ne klen Karl aus'n Woong raus, tat dr Cilla noch bedeuten, se sollt haußen bleibn, un machet mitn Paul zor Lodentür nei. De Richterfläschern freget ne aah, wos'r hobn wollt; do saht dr Willi: »E halb Pfund Rindfläsch net ze fett un e Pfund Knochen; un e Vertel Blutworscht. – – Wos macht dä dos zesamme?« De Fläscherschfraa saht: »Fümfesiebzig Pfeng.« Do nahm dr Willi en grußen Aalaaf un saht: »Frau Richtern, dr Paul hoot unner ganzes Kapital verschluckt. Dos worn zah Mark. Do sei se doch gedeckt, dä dos kimmt wieder raus. Wissen se, mer lossen dan Gung als Pfand do, do hoobn Se doch e Sicherhät.« De Richterfläschern krieget en Lachkrampf, dann saht se: »Gut, do blebt dar klene Gung drweile do!« Dos Geschäft war oder noch net alle, dä dr Willi fing nu aa: »Fraa Richtern, dar Gung is oder doch zah Mark wart, do müssen Se mer schie noch neun Mark fünfezwanzig Pfeng auszohln, mir müssen aah noch Brut huln!«
De Fläschern lachet esu, doß se dos aah machet un die Geschicht hoot sich nocher in lauter Wuhlgefalln aufgelöst.
