Der kläne Fritzsch-Gung in dr Mittelsayd' sollt emol ofn Semenar komme un do gehörets doch frieher drzu, daß 'r aa geing larne mußt. Mit darer Geingstund dos war nu in Mittelsayda gar net esu efach. 's gob en guten Geiger, ne Generalmusikdirekter vu dr Tanzmusik, ne Haug-Karl, un zu dan wur schließlich dar Gung in dr Stund geschickt. Gar esu garn machet dos ne Fritzsch-Gung sei Mutter net, dä se hatt an Haug-Karl dos un jens auszesetzen. Doß'r fei wink hinner de Weibsen har war, hatt in dan Fall net viel ze bedeiten, oder aah esu. 'r lief egal barbeß un när in Hem un Hus rim, mit seiner Rendlichkät warsch aah net zun besten bestellt. Oder in dr Nut frißt dr Teufel Flieng – un dr kläne Fritzsch-Gung machet nu jede Woch zwämol mitn Geingkasten nauf zun Haug-Karl. Dan sei klä Häusel stand über dr Stroß an Barghang dra. E Fraa hattr zu darer Zeit net, ich gelaab, die war vu ne waggezung.

Nu kimmt dos Gungel an en schien Nochmittig wieder emol zun Haug-Karl. Dar schien oder gerod käne Lust ze hobn, sei Konservatorium aufzemachen, zewingst hattr ewos Wichtigersch vir. »Weßt de«, saht dr, »ich hoo in mein Kaller e Ratt, die warn mer emol fange, un du tust mir halfen!« Dan Gungel war de Rattengagd natirlich zahmol lieber als dos Rümgerafel of dar alten Geig, un mer soong ne an de Aang aa, wie sichs freie tat.

Nu war in Haug-Karl sen Kaller e Aazucht, die ging e Stückel uner ne Garten wag un kam ben Stroßengrobn wieder raus. »Weßt de«, saht dr Karl, »du nimmst emol dan Sook un machst dich nunner ben Stroßengrobn bei dr Röhr hie. Hälst ne Sook dorten na, mußt oder aufpassen, daß se net drnaben waghuppt. Ich mach mich in Kaller un tu mitn Stackn neisterln?« Gesaht – geta! Dr Fritzschgung knieet e ganze Weil dort drunten un hiel krampfhaft dan Sook an dr Röhr naa. Er höret aa, wie dr Karl afing mitn Stackn in dr Röhr zu sterln un ze krawanzen, oder de Ratt kam net. Wies dan Gungel ze lang dauern tat, wollt's n Karl ze verstiehe gabn, daß nischt rachts fertig wur un wollts ne geleich durch dr Röhr zubläkn. 's hiel ne Kopp an dos Luch naa un schrier nei: »Haug-Karl!« Dodrüber mußt de Ratt net garschtig drschrocken sei, dä se war mit en Satz aus dr Röhr naus un nei in Kaller. Do stand dr Karl mit dr Krauthack in dr Hand un wollt'r drmiet 's Rückrot ewing gelambrig machen. Mei Ratt dos marken un wieder nei in dr Röhr war äs. Dr Karl kam nonner of dr Stroß un wollt mit dan Gungel Kriegsrot halten. 'r sterlet aah von unten nei in dr Röhr, oder de Ratt rühret sich net. Of emol schien ne e Gedank gekomme ze sei. »Weßt de«, saht'r, »itze hul ich emol mei Trompet un blos' in Kaller in der Aazucht nei, dos werd'r schie de Röhr verleiden! Oder halt mer fei ne Sook wieder an dr Schleuß naa.« 's dauret net lang, do hörets mit en mol, wie aus'n Ardsbuden raus, en ganz greuling Trompetenton. War schu dos Gungel drschrocken, do mußts de Ratt noch sehrner sei, dä wie e geölter Blitz fuhrsche aus dr Röhr naus un nei in Sook. Mei Gungel fix ubn zugehalten un nei in Kaller. »Ich hoo se!« schriersch, was när konnt. Der Haug-Karl strahlet. »Halt se när fest. Oder weßt de, gieh drweile nauf. Ich will se itze tut machen, dos brauchst de net ze sah!« Das Gungel trollet ab. War oder nu epper ne Haug-Karl racht viel Gemüt zutrauet, dar is ofn Holzwag. De Ratt wur gar net tut gemacht, die hub sich dr Haug-Karl bis zun Ohmd auf, do wollt'r sen Nachbar drmit auswischen und se dan in Kaller lossen.

Noch ener Weil kam mei Haug-Karl nauf in dr Stub un de Geingstund konnt lusgiehe. 'r war in dr saligsten Stimming un wollt wahrscheinlich sei Fräd musikalisch ze drkenne gabn; dä 'r nahm sei Geig har un spielet un jubilieret, aus en sanften Stück zu en fixen, aus en lauten zun leisen – de Engeln in Himmel könne net schönner spieln. Dos Gungel stand drbei un sperret Maul un Nos' auf. Un allemol, wenn dr Haug-Karl e racht schienes Stück runnergespielt hat, do setzet 'r ab un saht ganz salig: »Weßt de, ich bi när fruh, daß mer de Ratt hobn!«

's Ruprichschloß.

Drubn ben Fichtelbarg of dr Höh,
wu dr Sturm pfeift über de Falder voll Schnee,
do stieht in Gumferngrund ganz hinten –
dr Zahnte werd dos Flackel net finden –
e schienes Schloß, ganz aus Schnee un Eis,
dos glänzt wie Marmorstä hall un weiß.
Un rings üm dos Schloß is egal e Ruh,
de Fanster verhange, de Türn sei zu,
ka Ess, die raacht, kaa Mensch kimmt dorthie,
de Viecher bleibn von weiten schie stieh;
die Herscheln un Reh, die Füchs un de Hosen,
die sich zor Nachtzeit emol sahe lossen,
die schnuppern ewing, besah sich dan Flack
un – husch – sei se aa wieder wag.
Ofn Dach do stieht e Letter ubn drauf,
die gieht fei gerod bis in Himmel ubn nauf.
Doch horcht! Wenn in Wiesenthol zon Advent,
dos erschte Weihnachtslichtel brennt,
un wenn zon Afang dr heiling Zeiten
die Wiesentholer Adventsglocken läuten,
do steigt von Himmel, du grußes Wunner –
e Engele of dar Letter ronner.
Un kaum is in dan Schloß drubn nei,
do bricht aus de Fanster e haller Schei.
Wos alles in Schloß schlief in Fadern vrsteckt,
dar klane Engel hoots aufgeweckt.
Nu wergts un wisperts, dos hammert un pocht,
de Saag tut raspeln, dr Leimtop kocht,
korz, in ganzen Schloß is aus mit dr Ruh,
se hobn, wie's scheint, en Haufen ze tu.
Un wenn dr Niklis is komme ra,
do kimmt aus dan Schloß e alter Maa,
in grußen Pelz, in dr Hand en Stock
un ofn Buckel en grußen Sook.
Un wie dar Alte lafen kaa!
'r hoot Siebnmeilenstiefeln aa;
un miet en Schriet, dos gieht ritz – ratz –
is 'r schie ofn Johannisplatz.
Nu läft'r de Stroßen har un hie,
blebt bal bei jeder Haustür stieh,
steigt a de Treppen ronner un nauf,
befregt sich un schrebt sich alles auf.
E manichsmol schittelt'r mit'n Kopp
hört'r vu de Leit e garschtig Lob;
un bei maning, wos 'r do tut vernahme,
do möcht'r an liebsten ne Stacken nahme.
Doch alle Leit, die ne belieb'n
die hootr in sei Büchel geschrieb'n,
dodraus ersieht dr heilige Christ,
war dohierde recht artig gewasen is.
Ich hoo ne Ruprich gestern getroffen
un bie bis Klaffenbach mitn geloffen,
dann wur mer oder ze hampflich sei Schriet,
ich krieget ken Oden un konnt net mehr miet,
oder wos ich von Ruprich do gehört
ihr Leit, do gibts en Haufen beschert,
ihr könnts gelabn, wos ich eich soog –
ich wünsch a gesunde Feiertoog!