Pfaffernüsseln: Allerlei Erzgebirgisches - Max Wenzel

Dr verurachte Kermeßkuchen.

's war an Kermeßsonnohmd geleich nochn Assen, do saht dr Beutlerkarl in Ehrndorf zu seiner Fraa: »Weßt de, Olga, ich war mich heut noch emol naus in Revier machen, zu de Feiertog komm ich aah net drzu, un zor klen Kermeß möcht ich drwang garn en Hos assen!« De Olga hatt'n Kopp voll, dä se war backen gewasen un hatt en Haufen ze tue, wie's bei de Weibsen allemol is, wenn Feiertoog sei. Esu ganz »uhne« konnt se 'n oder doch net giehe lossen: »Bei dan Watter? Werscht doch dorch un dorch!« »'s hoot überhaupt aufgehört mit Regne«, saht dr Karl un machet sich zeracht. Der Tell, wos dr gruße Hund war, hatt kaum gesahe, wie dr Karl de Stiefeln aazug, do perzet'r wie verwerrt in Haus rüm, sudaß de Olga racht fruh war, wie die bäden Gagdgenossen mitenanner naus warn.

Der Karl machet mit sen Tell nochn Greifenstä zu. Gagdwatter war dos net, dos stand fest. Dr Hund tat aa friern, un 's log ne nischt dra, of de dracketen Acker rümzerenne. Ne Karl hätt sei Tell aah gedauert, wenn er'n hätt neigächen solln. Eham wollt'r oder aah net wieder giehe – heit war su e Toog, wu 'r seiner Olga racht garn aus'n Wag ging. »Ach«, dacht'r, »ich versäum aah nischt, ich gieh vollst ofn Greifenstä«. 's schien als hätten die Hosen aah drhem ze tue, war weß, vielleicht taten se de Kermeß aah miet feiern. E alter Hos' sauset emol übern Fald wag – vielleicht gings dan aah wie ne Karl. 'r hooten aah nischt geta un hiel sugar ne Hund zerück.

In Greifenstähaus warsch schie warm, wie mei Karl neikam. Un 'r war aah net dr enzige Gager, der ne häuslichen Frieden heit verlossen hatt. Der Reuther-Otto un dr Barth-Fritz soßen schie dorten un dr Dokter schien abn gekomme ze sei, dar wischet gerod de Flint ab. Die Fräd, doß noch ener kam. 's wur geleich e Doppelkoppkart bestellt un 's lustige Labn ging lus. Mer weß doch, wie's zugieht, wenn e Hardel Gager beisamme is. De Ehrndorfer Gager sei noch net emol de schlimmsten, do lafen de Lampenscherm när e fünkel lila aa, wu se wu annersch kitzeblaa warn. Dos is wuhl in jeden Revier esu, daß e anziger Gager – sein derzehln enoch – mehr geschossen hoot, als wie die annern allezam gesahe hobn. 's hoot emol ener gesaht:

De Kranne, die huppen,
De Kanter, die schnuppen,
alter Kas, dar tut riechen
un de Gager – die reden de Wahrhät.

Na, 's ma sei, wies will: unere Ehrndorfer Gager warn racht in Tritt un se sei erscht ehäm gegange, wie's draußen schie finster war. Der Tell un ne Reuther-Otto sei Hund logen drweile dorten un blinzelten när esu of ihre Harrn hie. Die dachten: Heut müssen mir ne wieder emol ne Wag weisen. Wie's oder afing ewing gefahrlich ze warn, do standen aah die Hünd auf un knurxten dorten rüm; die wußten ganz genau: Wenn mer ehäm komme, krieng de Mannsen de Grobhäten un mir de Schalln. Ich gelaab die Manner wärn noch net aufgestanden, wenn se net en grußen Dischkur übers Gelück agefange hätten. Dr Barth-Fritz hat zwölf Neigrosch in Doppelkopp verlurn un saht: »Ich war wieder emol mit dr Lieb afange, emende flackts do besser!« Der Reuther-Otto menet: »Wenn ich nischt geschossen hoo, hoo ich allemol Gelück bein Spieln!« Dr Dokter saht drzwischen nei: »Sie gewinne oder immer!« Die schlachte Redensart hatt dr Otto zon Gelück net geleich aufgenomme. De ganze Aussproch lief donaus, doß de Dumme 's meste Gelück hätten. Der Beutlerkarl fing itze aa aufzepassen. Dar hatt doletzt in dr Lotterie von dr »Fachtschul« ne Hauptgewinn gezung un en schien Schreibtisch gewonne. »Nu, wißt'r,« saht'r, »'s ma schie sei, oder wenn ihr en setten fein Schreibtisch gewonne hätt, tät'r aah nischt soong!« Dodermiet kam se of dan Schreibtisch ze sprachen. »'s werd e schie Ding sei«, dos war ne Barth-Fritz sei Aasicht. Der Dokter menet aah, zu die Gewinner wär zemerscht nischt drzu, 's wärn immer sette alte Lodenhüter aus en Möbelloden. Ne Beutlerkarl tat dos kränken. »En geschenkten Gaul guckt mer net ins Maul,« saht'r, »saht'n eich när erscht emol aa, dan Schreibtisch, ehr'r 's gruße Maul hobt!« Doderbei warn se oder aufgestanden un machetn zon Ding naus. Se hatten sich ne richting Zeitpunkt rausgesucht, doß se ewing oogekühlt wurn, – se regnet, wos när von Himmel ronnerkonnt. Un nu warsch noch drzu stockfinster, daß se von ener Pfitz in dr anern neipatscheten. Wie se bei dr Ritterhöhl nakame, soß e alter Hos, dar von Kreiervorwerich rüber komme war, dorten un soog die Gager abziehe. »'s Genick sollt'r brachen, ihr ruppets Volk« saht'r. Un 's is alte Sach, daß in en Hos oft esu wos wie e Hax stackt. Un 's war net schie, daß unere Gager en setten Wunsch miet ehamkriegeten. Se kame oder gelücklich 's Ding nonner bis se an Beutlerkarl sen Haus warn. Do blieben se traten un wollten Abschied nahme. Of emol saht dr Karl: »Gieht när geleich emol miet nauf, ich will eich men Schreibtisch emol zeing!« Die Mannsen ließen sich dos net zwämol soong, se tratscheten zor Haustür nei un de Hund hinerhar. Bei dan Krawall kam de Beutler-Olga geleich zor Küchentür rausgefahrn, se fuhr oder abn esu fix wieder nei, wie se die Mannsen soog. Se war werklich ganz außer sich. E paar Toog hatt se gewergt, daß 's ganze Haus glänzet wie gewichst, un nu kame die dracketen Gager mit ihrn Stiefeln neigesappt, ja se macheten sugar de Trepp nauf, die se erscht an Nochmittig noch emol getont hatten, daß se aussoog wie e weiß Faderbett. Heiln hätt se könne vir Wut, wie se de Mannsen ubn nauf krachen höret.