Mit hundert sîner manne er von dem bette spranc. 962
si zucten zuo den handen diu scharphen wâfen lanc:
si liefen zuo dem wuofe jâmerlîchen dan.
dô kômen tûsent recken, des küenen Sîvrides man.
Dô si sô jâmerlîche die vrouwen hôrten klagen, A.963
dô wânden sumelîche, si solden kleider tragen.
jane mohten si der sinne vor leide niht gehaben:
in was michel swære in ir herze begraben.
Dô kom der künic Sigemunt, da er Kriemhilde vant. 964
er sprach: ‚ouwê der reise her in ditze lant.