ir vater hieß in küssen: dô blicte si in an:
er dûhte si sô vorhtlîch, daß siß vil gerne hete lân.
Doch muoste si dâ leisten, daß ir der wirt gebôt. 1605
gemischet wart ir varwe, bleich unde rôt.
si kuste ouch Dancwarten, dar nâch den spilman:
durch sînes lîbes ellen wart im daß grüeßen getân.
Diu junge marcgrâvinne nam bî der hant 1606
Gîselher den jungen von Burgunden lant:
alsam tet ir muoter Gunther den küenen man.
si giengen mit den helden vil harte vrœlîchen dan.