dô vrâgter in der mære, als im diu sorge gebôt.
‚Nu sagt mir, meister Hildebrant, wie sît ir sô naß 2247
von dem verchbluote? oder wer tet iu daß?
ich wæne, ir mit den gesten zem hûse habt gestriten:
ich verbôt eß iu sô sêre: dô het irß billîch vermiten.‘
Dô sagte er sînem hêrren: ‚eß tet Hagene: 2248
der sluoc mir dise wunden in dem gademe,
dô ich von dem recken wolde wenden dan.
mit mînem lebene dem tiuvel kûme ich entran.‘
Dô sprach der Bernære: ‚vil reht ist iu geschehen, 2249