12) Frage viel, glaub aber nit alles waß du hörest vnd weist, vertrawe nit ein Jeden so hastu desto weniger zu verantwortten.

13) Mache deine Rechnung, was dir zu thun vnd leidenlich ist.

14) Biedet man dir ein Billiches, vnd Ruͦckhet zu deinen vorhabenden Zill, so druckhe bald ab ehe dichs Reuet.

15) Keinen aber gib dein eußerstes wortt, bis er nicht zuvor selbst dazue Ruckht.

16) Bedenckhe daß ihrer Viel deiner wahrn auch haben, vnd milder im hingeben sein möchten alß du; derselben Köpff mustu dich auch annehmen, wiltu anderst nit steckhen bleiben.

17) Seye resolvirt vnd vorbedacht, was zue thun ist, drockhe nit lang, bis vff den Letzen pfennign, dann man scheucht solche verkauffer.

18) Verliehren zu Rechter Zeit ist auch Eine Kunst.

19) Hastu aber eine wahr allein, so genieß derselben, doch machs Brüderlich, laß einen andern auch was wagen vnd gewinnen.

20) Deine alte vnd gute kunden, verlaß nit gern, vnd truckhe sie nit zuhardt, dann es thut jhnen weher als einen Frembden.

21) Neben einer würdigen wahr setze eine Vnwürdige, nemb von einer jeden ein leidenlichen gewinn, daz ist dir nutzer vnd löblicher, alß wann du eine zu hock spannest.