“Wuh yo’ tittie tell you, Joe?”
“W’en de lion git’way out de sukkus ’e gone spang f’um Orangebu’g to Sawlketchuh swamp en’ ’e nebbuh stop ’tell ’e git Lewisbu’g!”
“Wuffuh him haffuh stop Lewisbu’g, Joe?”
“Enty you know suh Maussuh’ nigguh’ fat? Maussuh’ nigguh’ fat fuh sowl! Lion hab sense ’nuf fuh know fat nigguh w’en ’e shum, en’ him kin smell fat nigguh mo’ fudduh den him kin smell po’ nigguh, en’ Maussuh mek shishuh hebby crap uh rice en’ ’tettuh en’ t’ing dat him nigguh’ fat mo’nuh all dem todduh nigguh’ ’puntop Cumbee ribbuh!
“Soon ez de lion git Lewisbu’g, ’e stop. ’E know suh him bittle dey dey, en’ ’e mout’ biggin fuh run water. Bumbye duh night-time, ’e woice roll een Maussuh’ pinelan’ en’ all dem nigguh’ tarrify’ sukkuh chickin tarrify’ w’en fu’lhawk’ wing t’row shadduh obuhr’um! Dem nigguh’ ’f’aid ’tell dem fool! Dem lock demself een dem house duh night, en’, alldo’ ’e duh summuhtime, dem mek fiah fuh bu’n so de lion cyan’ come down de chimbly. W’en de lion cyan’ git no nigguh’ fuh eat ’cause dem all lock’up, ’e gone duh ’ood en’ meet uh cow en’ ’e kill him fuh ’e bittle. W’en ’e done nyam de t’ree cow—”
“T’ree cow! Joe, hukkuh him kin eat t’ree cow’ w’en ’e only kill one?”
“Him nyam t’ree cow’, enty? Him kin nyam’um uh dunkyuh ef ’e yent dead. You ebbuh see lion? Wuh Pon Pon nigguh know ’bout lion? Seem lukkuh w’en ’e done nyam dem t’ree cow’, ’e jis’ mek’um fuh hongry good, en’ ’e gone back nigguhhouse yaa’d fuh see ef him kin git uh chance fuh nyam nigguh’. ’E walk up en’ down, ’e t’rash’ ’e tail, ’e gnash’ ’e teet’ en’ ’e holluh sukkuh jackass en’ alligettuh en’ bull all t’ree one time! You kin yeddy dem nigguh’ een dem house duh pray. Dem eb’ry Gawd’ one prommus dem Jedus fuh folluh Him wu’d, ef ’e only spayre dem life. One tell’um suh ef Him tek de lion’ jaw off’um, him nebbuh t’ief Maussuh’ rice no mo’, en’ eb’ry one tell de Lawd ’bout some uh dem light sin wuh dem willin’ fuh t’row’way ef dem life sabe.”
“Light sin! Mekso dem ent prommus fuh t’row’way dem hebby sin?”
“No, man, dem ent fuh t’row’way dem hebby sin, uh dunkyuh ef lion crack dem bone’. Een slabery time nigguh baig ’e maussuh’ paa’d’n fuh t’ief ’e fowl w’en ’e git ketch, but w’en ’e kill cow, ’e nebbuh crack ’e teet’, en’ eb’n so ef ’e maussuh ketch’um duh skin de cow, him fuh tell ’e maussuh ’e fin’um dead een de ’ood, en’ ’e duh skin’um fuh tek de hide to ’e maussuh fuh sabe’um f’um buzzut! No, man; oonuh fuh hol’ oonuh hebby sin sukkuh sheep buhr hol’ mule’ tail, ’tell Gabrull blow ’e hawn en’ de Lawd tek’um off!”
“Bumbye w’en dayclean en’ de lion nebbuh git no nigguh, ’e gone en’ kill fo’ mo’ cow’, en’ w’en ’e done nyam’um ’e gone duh ’ood en’ leddown fuh tek ’e res’, en’ nobody nebbuh yeddy’um ’gen ’tell Sat’d’y night come. All t’ru de week de nigguh’ swonguh en’ sattify een dem min’ ’cause dem t’ink suh dem pray’ mek de lion fuh gone’way en’ le’m’lone, but ’e yent duh no pray’ mek’um fuh gone, duh dem fo’ cow’ wuh ’e nyam, mek’ ’e belly full ’tell ’e yent hab no room fuh nigguh!”