| Ric’ Whytyngton, | John Boteler, m’c’. | Ao. vij. |
| m’cer, maior. | Rob’t Whytyngton, drap’. |
The weddyng of the kyng and quene Kateryne in Fraunce.
The sege of Melau and of manye mo citees, townes and castell.
This same yere was the kyng Herry the fyfthe mad heir and regent of Fraunce, and wedded to dame Katerine the kynges doughter of Fraunce, at Troys[104] in Champayn, upon Trynyte Soneday; and anoon after he hymselfe and hise lordes, with the duke of Burgoyne and manye othere ryalles of Fraunce, wenten and leyd sege to manye diverses citees, townes and castellys, whiche weren holden with the dolphyns men and Armenakes, and wan them; but Melau sur Seyne was on of the werste that evere he leyde sege to, for ther was inne a schrewd meyne of rebelles.
| Will’s Cambregge, | John Boteller, drap’. | Ao. viijo. |
| groc’, maior. | John Welles, groc’. |
The coronacion of the quene at Westm’.
This yere on Candelmasse day be the morwe the kyng come into Engelond with hys quene, and landed at Dovorr; and on the xiiij day of Fever, upon seynt Valentynes day, the kyng come to London; and the xxj day of the same monthe the quene come to London; and on the xxiij day of the same monthe sche was crowned at Westm’.[105] A parlement at Westm’.
The kyng ordeyned certeyn weyghtes for gold.Also this same yere, anoon after Estren, the kyng helde his parlement at Westm’; in whiche parlement was ordeyned, that no man after Cristemasse thanne nest folwynge schulde putten forth no proffre no gold in payment but yf it held the weyte, wherfore the most part of the peple ordeyned them balaunces and weytes. And anoon after Pentecost the kyng seiled over the see to Caleys, and passyd forth into Fraunce. The deth of the duke of Clarence.This same yere upon Estre even afore noon, that is for to say the xxij day of March, the yere of oure lord a mlccccxxj, the duke of Clarence with manye other lordes were sclayn beyounde the water of Leyre in Fraunce; and manye lordes were taken prisoners the same tyme, of the whiche the erle of Hunt’, and the erle of Somerset with hys brother, were principales. The town of Mileu was yolden.Also the same yere, betuen Cristemasse and Candelmasse, the town of Mileu’ was yolden to the kyng, and alle cheveteyns with the sowdyours were ledd to Parys in the croke of the mone they myght seyn, for of them there skaped thens but fewe on lyve.
REX HENRICUS QUINTUS. [1421-1422.]
| Rob’t Chycheley, | John Weston, drap’. | Anno ixo. |
| groc’, maior. | Ric’ Gosselyn, irmong’. |
A parlement at Westm’, and a xvme and a dyme graunted.
This yere, on the thridde day of December, began the parlement at Westm’, whiche was holden be the duke of Bedforde, thanne lyftenaunte of Engelond; in whiche parlement was graunted a quynzyme and a dyme, the kyng hymself thanne lyenge at the sege of Mieux in Bry’, in Fraunce, the half of whiche xve and xme to be payd at the purification of oure lady nest folwynge, and that the kynges deputes schulde resceyve in payement swyche gold as wente; that is to seye, zif a noble were worth v s. viij d., the kyng schulde taken it to the value of vj s. viij d.; and if it were lesse than v s. viij d., thanne the persone so payenge that money schulde make good the surplus to the value of v s. viij d. to the kyng, in contentyng the kyng of the hol noble of vj s. viij d.; and in cas the noble so paied were better of value thanne v s. viij d., it was accorded that the kyng schulde paye to the awnere therof the overplus above v s. viij d.: also thanne was gret scarcete of whit moneye in Engelond, that is to seye of sylver, for every man, because of the said newe eschange, outred gold and kept sylver in as moche as they myghte. The birthe of kyng Herry the vjte.Also in the forseid monthe of Decembre, on seynt Nicholl day, the yere of oure lord a mlccccxxj, Herry the kynges sone was born at Wyndesore, whos goodfadres at the font were Herry bysshop of Wynchestre, sithe Cardynall, and John duke of Bedford, and Jacomyn duchesse of Holand was hys goodmodyr; and his goodfadir at his confirmacion was Herry Chicheley erchebysshop of Caunterbury. Mewes in Bry’ was yolden.
The newe wedercock of Poules was set up.Also in the monthe of May,[106] the yere of oure lord a mlccccxxij, and of the kyng the x yere, the citee of Mewes in Bry’, whiche longe tyme hadde be seged, was yolde to the kyng. Also the same yere, the xiij day of August, the newe wedircock was set upon Seynt Poules stepill of London: and the laste day of the same monthe of August deyde the most excellent, and most graciouse, and most doutyd prynce of Cristen chivalrye, Herry of Engelond the fyfthe, after the conquest the xe, whos boones, in the begynnyng of Novembre folwynge, were brought into Engelond, and after to London; and on the vij day of Novembre he was ryally entered at Westm’.