NOMI’A MAIOR’ ET VICECOMITU’ LONDON’ TEMPORE REG’ H’ SEXTI PU’ NON UNI’ ANNI QUI REGNARE CEPIT PRIMO DIE SEPTE’BR’ ANNO D’N’I MILL’MO CCCCmo xxijdo.

REX HENRICUS SEXTUS. [1422-1423.]

Will’s Waldern,Will’ Estfeld, m’c’.Ao. po.
m’c’, maior.Rob’t Tatersale, drap’.

This same yere upon a Wednesday the xxj day of Octobre, on the morwe be vj[107] and vij on the belle, deyde kyng Charles kyng of Fraunce the kynges aiel of Engelond, in his ostell of seynt Poule withinne Parys, whos body was worthyly entered in seynt Denys. Also the vij daye of Novembre the same yere, oure kyng Herry the fyfthe nobely was entered at Westm’. A parlement at Westm’.
The governaunce of the K. was ordeyned by parlemente.
Wm. Tailor an heretyk was brent.Also in this yere the kynges parlement was holden at Westm’, which parlement began the Moneday nest before the feste of seynt Martyn, that is to seye the ix day of Novembre, in whiche parlement was ordeyned the governaunce of the kyng, how and in what manere he schulde be governed in his tender age.[108] Also in this yere on the firste day of March Maistr’ William Taillor prest, was disgraded of his ordre of presthood; and in the morwe after he was brent in Smythefeld for certeyn poyntes of heresye.

REX HENRICUS SEXTUS. [1423-1424.]

Will’s Crowm’e,Th’ Wandesford, m’c’.Ao. s’c’do.
drap’, maior.Nicholl Jamys, groc’.

This yere upon Satyrday, that is to sey the xiij day of Novembre, the kyng and the quene his modir remeved from Wyndesore toward the parlement at London, the whiche began at Westm’ on the xxj day of Octobre before; and on the forsaid xiij day of Novembre at nyght, the kyng and the quene were logged at Stanes; and upon the morwe thanne beynge Soneday the kyng was born toward his modir chare, and he schriked and cryed and sprang, and wolde nought be caryed forthere; wherefore he was born ayeyne into the inne, and there he bood the Soneday al day; and on the Moneday he was born to the chare, and he beynge thanne gladde and merye chered; and at even come to Kyngeston, and there rested the nyght; and on the Tuesday he come to Kenyngton; and upon Wednesday he cam to London[109] with a glad sembland and mery chere, in his modyr barm in the chare rood thorugh London to Westm’; and on the morwe brought into the parlement. The weddyng of the kyng of Scottes.Also this same yere in the monthe of Feverer, Sire Jamys Styward kyng of Scottes spoused dame Johanne the duchesses doughter of Clarence, of hir first housbonde the erle of Somerset, at seynt Mary Overe. The bataill of Vermill.And this same yere the xvij day of August was the bataill of Vermill in Perche, betuen the duke of Bedford regent of Fraunce, and the Armynakes, with the Scottes: but thankyd be God the victorye fell to the Englyssh partye; for there were sclayn of oure adversaryes the erle of Bougham, the erle Douglas, the erle of Almar, the erle of Tonnar, the erle of Vauntedore, and the viscount Nerbon that traytourly sclewe the duke of Burgoyne knelyng before the dolphyn at Moterell, and manye mo to the noumbre of x ml and mo: but the moste vengeaunce fell upon the proude Scottes; for there wente to schep wassh of them the same day mo thanne xvijc of cote armes be a countynge of herowdes.