Vermibus esca meis iaceo data, non tamen usque
Usque adeo exanguis quin tibi vera loquar.
Ore loquor latio, nec mirum, candide amice,
Filia nam vatis sum memoranda pii.
Imbutam ausonia cupiens me reddere lingua
Artibus et pariter me decorare bonis,
Nocte dieque docens, pater ut charissimus, ipse
Fundamenta mihi dulcia et ampla dabat.
Docta forem celebres nimirum amplexa camænas,
Et canerem blandis carmina pulchra modis.