Vive memor leti, viciis abstersus, et illam
Spem tibi vivendi, si sapis, abjicito.
Ore nites hodie pulchro, sed stamine secto
Protinus in nihilum te impia Parca rapit.
Hoc experta scio, quoniam virguncula nuper
Annos nata decem rapta repente fui.
Ut rosa florebam sociis virtutibus illis
Quæ cerni in tenera virginitate solent.
Sed tamen interii crudelibus obruta fatis,
Iam data carnivoris vermibus esca meis.