Impressum Parrhisiis, e regione scholæ Decretorum, anno Do[mini] M.D.XXIII, die xv mensis febr.
Godofredus Torinus Biturigicus lectori candido s(alutem).
Egregii quidam sunt felici hoc seculo pictores, lector humanissime, qui suis lineamentis, picturis et variis coloribus deos gentilitios et homines, itemque alias res quascunque adeo exacte depingunt, ut illis vox et anima deesse tantummodo videatur; sed ecce, lector humanissime, ego iam tibi illorum propemodum more, domum offero, non solum suis lineamentis et partibus elegantem et absolutam, sed etiam pulchre loquentem et encomio sese particulatim describentem. Offero etiam tibi septem Epitaphia antiquo more et sermone veterrimo conficta et conscripta, varios miserorum hominum amantum affectus pervio quodam modo ostendentia. Ipsa tibi (inquam) lubens offero, non ut ita verbis obsitis loquaris aut scribas, sed ut antiquitatem ipsam tibi ante oculos tuos faciles et iucundissimos habeas, et te a me benemonitum intelligas, ut in amoris insani laqueos et angustias devenire caveas. Vale.
Gotofredus Torinus Biturigicus ad reginam Leonoram.
Pergimus hunc, Leonora, tuum celebrare triumphum,
Quem tibi Parrhisii contribuere tui.
Tam pia tu nobis extas regina quod omnes
Dicere te veram possumus esse DEAM.