nuntiat aut ratibus ventos aut urbibus hostes.
devenere locum, Cereris quo tecta nitebant
Cyclopum firmata manu: stant ardua ferro
moenia, ferrati postes, inmensaque nectit
claustra chalybs. nullum tanto sudore Pyragmon 240
nec Steropes construxit opus: non talibus umquam
spiravere Notis animae nec flumine tanto
incoctum maduit lassa cervice metallum.
atria cingit ebur; trabibus solidatur aënis
culmen et in celsas surgunt electra columnas. 245