Alyssum nob. facile distinguendum sequentibus notis. Silicula subrotunda, disco convexo, limbo compresso, apice retuso, loculis dispermis, funiculis basi septo adnatis et post lapsum seminum persistentibus, supra liberis et cum iisdem deciduis, in diversis loculis oppositis, in eodem a styli basi equidistantibus: Petalis emarginatis: Filamentis omnibus nonnullisve appendiculatis in speciebus omnibus præter A. calycinum in quo filamenta filiformia simplicia sunt et glandularum loco setulæ quatuor filamenta nana æmulantes exstant.

Ad Alyssum sic constitutum et herbas plerumque annuas pube stellari foliisque integerrimis complectens pertinent A. campestre et calycinum Linn. strigosum Russell. minimum Willd. et strictum ejusd. a quo densiflorum Desfont. vix differt; fulvescens Smith, umbellatum Desv. rostratum Stev. micropetalum Fisch. hirsutum Bieb. aliasque species ineditas.

[93]

FARSETIA.

Farsetia. Turra Farsetia, p. 5. Farsetiæ sp. Hort. Kew. ed. 2. vol. 4. p. 69. De Cand. Syst. 2. p. 286.

Char. Gen. Calyx clausus, basi vix bisaccatus. Filamenta omnia edentula. Antheræ lineares. Silicula ovalis v. oblonga, sessilis, valvis planiusculis, loculis polyspermis (raro 1-2-spermis), funiculis liberis. Dissepimentum uninerve, venosum. Semina marginata. Cotyledones accumbentes.

Herbæ suffruticosæ ramosæ, pube bipartita appressa incanæ. Folia integerrima. Racemi subspicati.

Obs. Dissepimentum in omnibus exemplaribus utriusque speciei a nobis visis completum, sed in F. ægyptiaca quandoque basi fenestratum, fide D. Desfontaines. (Flor. Atlant. 2. tab. 160.)

F. ægyptiaca species unica certa est, nam F. stylosa, cujus flores ignoti, ob stigmatis lobos patentes non absque hæsitatione ad hoc genus retuli.

Farsetia? stylosa, ramosissima, siliculis oblongis polyspermis passimque brevè ovalibus 1-2-spermis, stylo diametrum transversum siliculæ subæquante, stigmatis lobis patentibus.