Per eumdem R. D. Maurianne generalem Vicarium et Officialem.
(locus sigilli.)
MEMORIALE
Anno premisso et die quinta mensis junii comparuerunt judicialiter coram nobis Vicario generali Maurianne Franciscus Ameneti consindicus Sancti Julliani asserens venisse a loco sancti Julliani ad fines remittendi in manibus egregii Anthonii Fillioli procuratoris Animalium brutorum cedulam signatam Rembaud producendam pro deffensione dictorum Animalium quiquidem egregius Fillioli produxit realiter eandem cedulam incohantem Approbando etc. signatam Rembaud dicens concludens et fieri requirens pro ut in eadem cedula continetur. Hinc et egregius Petremandus Bertrandi procurator dictorum sindicorum Sancti Julliani agentium petiit copiam dicte cedule. Inde et nos Vicarius generalis Maurianne prefatus partibus premissis diem assignamus veneris proximam duodecimam presentis mensis junii nisi etc. ad ibidem coram nobis comparendum et tunc per dictum egregium Bertrandi nomine quo supra quid voluerit deliberare deliberandum eidem concedendo copiam dicte cedule per eum requisitam. Datum in civitate Sancti Johannis Maurianne die et anno premissis.
COPIA CEDULE
Approbando et in quantum de facta in medium adducendo ea que hoc in processu antea facto fuerunt et potissimum scedulam productam ex parte egregii Baudrici procuratoris Animalium signatam Claudius Morellus egregius Anthonius Fillioli procurator et eo nomine a reverendo domino Vicario constitutus occasione tuendorum ac deffendendorum Animalium de quibus hoc in processo agitur ut in actis ad quæ impugn ...... super relatio habeatur et brevibus agendo ac realiter deffendendo excipit et opponit ac multum miratur de hujusmodi processu tam contra personas agentium quam contra insolitum et inusitatum modum et formam procedendi de eo saltem modo quo hactenus processum fuit maxime cum agitur de excommunicatione Animalium quod fieri non potest quia omnis excommunicatio aut fertur ratione contumaciæ cap. primo et ibi Gr. De sententiis excommunicationis lib. 6. at cum certum est dicta animalia in contumacia constitui non posse quia legitime citari non possunt per consequens via excommunicationis Agentes uti non possunt nec debent eo maxime quod Deus ante hominis creationem ipsa Animalia creavit ut habetur Genesi ib. Producat terra animam viventem in genere suo jumenta et reptilia et bestias terre secondum species suas benedixitque eis dicens crescite et multiplicamini et replete aquas maris avesque multiplicentur super terram quod non fecisset nisi sub spe quod dicta Animalia vita fruerentur tum quod ipse Deus optimus maximus creator omnium Animalium tam rationabilium quam irrationabilium cunctis Animalibus suum dedit esse et vesci super terram unicuique secondum suam propriam naturam certum est et potissimum plantas ad hoc creavit ut animalibus deservirent est enim ordo naturalis quod plante sunt in nutrimentum Animalium et ...... quedam in nutrimentum aliorum et omnia in ...... hominis. Genes: 9: ibi Quasi olera virentia tradidi vobis omnia a Deo quod dicta Animalia de quibus Adversantes conqueruntur modum vivendi a legi ordinatum non videtur egredi tum quia bruta sensu et usu rationis carentia que non secondum legem divinam gentium canonicam vel civilem sed secondum legem naturæ primordialis qua Animalia cuncta docuit vivere solo instinctu naturæ vivunt et ut ait Philosophus actus activorum non operantur in patienti ...... tum quia jura naturalia sunt immutabilia § Sed naturalia Instit.: de jur natur. gent. et civili. ergo cum dicta Animalia solo instinctu naturæ dicantur per consequens excommunicanda non veniunt. Et quamvis dicta Animalia hominibus subjecta esse dicantur ut habetur Ecclesiast: 17. ibi Posuit timorem illius super omnem carnem et bestiarum ac volatilium non idcirco adversus talia Animalia licet subjecta uti non debent excommunicatione nec ullo modo veniunt petita executioni mandanda saltem modo petito presertim cum ratio et æquitas dicta Animalia non regat. Et licet juribus divino antiquo civili et canonico promulgatum legitur Qui seminat metet ut habetur Esai 37 ibi. In anno autem tertio seminate et mettete et plantate vineas et commedite fructum earum non tamen cequitur (sic) quin dicta Animalia plantis non utantur quia sunt irrationabilia et carentia sensu neque ea posse dicernere quæ sunt usui hominum destinata vel non certissimum est quia solo instinctu nature ut supra dictum est vivunt non idcirco necesse habent Agentes adversus dicta Animalia uti excommunicatione sed ...... peccata eorum universus populus presertim quem hujusmodi flagella affligunt et prosequuntur et pœnitentiam agat exemplo Ninivitarum qui ad solam vocem Jone prophete austeriter pœnitentiam egerunt ad mittigandam et placandam iram Dei. Jon. 3. veniat populus et imploret misericordiam Dei optimi et sic maximi ut sua sancta gratia et per merita sanctissimæ passionis excessum dictorum Animalium compessere et refrenare dignetur et hoc modo dicta Animalia e vineis ejicient et non eo modo quo procedunt. Quibus universis consideratis evidentissime patet dicta Animalia e vitibus seu e vineis ejicienda non esse attento quod solo instinctu naturæ vivunt et ita per egregium Anthonium Fillioli eorumdem Brutorum legittimi actoris fieri instatur et ab ipso petitur ipsum monitorium requisitum in quantum concernit dicta Animalia revocari et annullari nec aliquo modo consentiendo quod dictum monitorium eis concedatur nec etiam aliqui visitationi vinearum ut est conclusum per Agentes in eorum supplicatione protestando de omni nullitate et hoc omni meliori modo via jure ac forma salvis aliis quibuscumque juribus ac deffentionibus competentibus aut competituris humiliter implorato benigno officio judicis.
Petrus Rembaudus
MEMORIALE
Anno premisso et die duodecima mensis junii comparuerunt judicialiter coram nobis Vicario generali Maurianne prefato egregius Petremandus Bertrandi procurator dictorum Agentium petens alium terminum. Hinc et egregius Anthonius Fillioli procurator dictorum Animalium petiit viam precludi parti quidquiam ulterius deliberandi et producendi. Inde et nos Vicarius generalis Maurianne prefatus partibus premissis diem assignamus veneris proximam decimam nonam presentis mensis nisi etc. ad ibidem judicialiter coram nobis comparendum et tunc per dictum Bertrandi nomine quo suppra quid voluerit precise deliberare deliberandum. Datum Maurianne die et anno premissis.