Quod veluti patriis regionibus utitur hospes:
Quod sedem mutare licet: quod cernere Thulen
Lusus, et horrendos quondam penetrare recessus:
Quod bibimus passim Rhodanum, potamus Orontem;
Quod cuncti gens una sumus. Nec terminus unquam
Romanae dicionis erit. Nam cetera regna
Luxuries vitiis odiisque superbia vertit.
Sic male sublimes fregit Spartanus Athenas
Atque idem Thebas cecidit. Sic Medus ademit
Assyrio, Medoque tulit moderamina Perses: