"Hae than, there's fower an' a bawbee for expenses o' the war."
"Thank ye, General."
"Ye hae an auld gun, haena' ye?"
"Ay have I; but she's nearhan' the rivin'."
"Load her to the mou', and lat her rive. We'll may be hear't. But haud weel oot ower frae her. Ye can lay a train, ye ken."
"I s' tak care o' that, General."
"Scrumpie, ye bide no that far frae the draigon's den. Ye jist keep yer ee—nae the crookit ane—upo' her ootgoins an' incomins; or raither, ye luik efter her comin oot, an' we'll a' luik efter her gaein in again. Jist mak a regiment o' yer ain to watch her, and bring ye word o' her proceedins. Ye can easy luik roun the neuk o' the back-yett, an' nobody be a hair the wiser. As sune as ever ye spy her lowse i' the yard be aff wi' ye to Willie Macwha. Syne, Curly, ye fire yer gun, and burn the blue lichts o' the tap o' the hoose; and gin I see or hear the signal, I'll be ower in seven minutes an' a half. Ilka ane o' ye 'at hears, maun luik efter the neist; and sae we'll a' gether at Curly's. Fess yer bags for the stanes, them 'at has bags."
"But gin ye dinna see or hear, for it's a lang road, General?" interposed Cadger.
"Gin I'm no at your yard, Curly, in saiven minutes an' a half, sen' Linkum efter me. He's the only ane o' ye 'at can rin. It's a' that he can do, but he does't weel.—Whan Juno's ance oot, she's no in a hurry in again."
The boys separated and went home in a state of excitement, which probably, however, interfered very little with their appetites, seeing it was moderated in the mean time by the need and anticipation of their dinners.