Ful wel she sange the servicë devine,
Entunëd in hire nose ful swetëly;
And Frenche she spake ful fayre and fetisly[[24]]
After the scole of Stratford-attë-Bowe,[[25]]
For Frenche of Paris was to hire unknowe.
At mete was she wel ytaught withalle;
She lette no morsel from hire lippë falle,
Ne wette hire fingres in hire saucë depe.
Wel coude she carie a morsel, and wel kepe,
Thatte no drope ne fell upon hire brest.