Nec sua credulitas piscem suspenderat hamo.
Cuncta sine insidiis, nullamque timentia Fraudem,
Plenaque Pacis erant. Postquam non utilis auctor
Victibus invidit (quisquis fuit ille virorum),
Corporeasque dapes avidam demersit in alvum.
Fecit iter sceleri; primâque e cæde Ferarum
Incaluisse putem maculatum sanguine ferrum.
Idque satis fuerat; nostrumque petentia letum
Corpora missa neci, salvâ pietate, fatemur:
Sed quàm danda neci, tàm non epulanda, fuerunt.