"Ye mind 'at she keepit him at hame frae the kirk on Sabbath, because he had a cauld?" Leeby said. "Ay, me or my father would hae a gey ill cauld afore she would let's bide at hame frae the kirk; but Jamie's different. Weel, mair than ance she's been near speakin' to 'im aboot the glove, but she grew fleid aye. She was so terrified there was something in't.
"On Sabbath, though, she had him to hersel, an' he wasna so bright as usual. She sat wi' the Bible on her lap, pretendin' to read, but a' the time she was takkin' keeks (glances) at him. I dinna ken 'at he was broodin' ower the glove, but she thocht he was, an' just afore the kirk came oot she couldna stand it nae langer. She put her hand in her pouch, an pu'd oot the glove, wi' the paper round it, just as it had been when she came upon't.
"'That's yours, Jamie,' she said; 'it was ill-dune o' me to tak it, but I couldna help it.'
"Jamie put oot his hand, an' syne he drew't back. 'It's no a thing o' nae consequence, mother, he said.
"'Wha is she, Jamie?' my mother said.
"He turned awa his heid—so she telt me. 'It's a lassie in London,' he said, 'I dinna ken her muckle.'
"'Ye maun ken her weel,' my mother persisted, 'to be carryin' aboot her glove; I'm dootin' ye're gey fond o' her, Jamie?'
"'Na,' said Jamie, 'am no. There's no naebody I care for like yersel, mother.'
"'Ye wouldna carry aboot onything o' mine, Jamie,' my mother said; but he says, 'Oh, mother, I carry aboot yer face wi' me aye; an' sometimes at nicht I kind o' greet to think o' ye.'
"Ay, after that I've nae doot he was sittin' wi' his airms aboot her. She didna tell me that, but weel he kens it's what she likes, an' she maks nae pretence o' its no bein'. But for a' he said an' did, she noticed him put the glove back in his inside pouch.