THE GARMOND OF FAIR LADIES.
By ROBERT HENRYSON.
Wald my gud lady lufe me best,
And wirk eftir my will,
I suld ane Garmond gudliest
Gar mak hir body till.
Off hie honour suld be hir hud,
Upoun hir heid to weir,
Garneist with governance so gud,
Na demyng suld hir deir.
Hir sark suld be hir body nixt,
Of chestetie so quhyt,
With schame and dreid togidder mixt,
The same suld be perfyt.
Hir kirtill suld be of clene constance,
Lasit with lesum lufe,
The mailyheis of continuance
For nevir to remufe.
Hir gown suld be of gudliness
Weill ribband with renowne,
Purfillit with plesour in ilk place,
Furrit with fyne fassoun.
Hir belt suld be of benignitie,
About hir middill meit;
Hir mantill of humilitie,
To tholl bayth wind and weit.
Hir hat suld be of fair having
And her tepat of trewth,
Hir patelet of gude pansing,
Hir hals-ribbane of rewth.
