Hir slevis suld be of esperance,
To keip hir fra dispair;
Hir gluvis of the gud govirnance,
To hyd hir fyngearis fair.
Hir schone suld be of sickernes,
In syne that scho nocht slyd;
Hir hoiss of honestie, I ges,
I suld for hir provyd.
Wald scho put on this Garmond gay,
I durst sweir by my seill,
That scho woir nevir grene nor gray
That set hir half so weill.
| GLOSSARY. | |
| esperance, hope. | patelet, ruffet. |
| fassoun, manners. | quhyt, white. |
| garmond, garment, costume. | rewth, pity. |
| governance, discretion. | sark, shirt, chemise. |
| hals-ribbane, neck-ribbon. | scho, she. |
| hoiss, hose. | schone, shoes. |
| hud, hood. | seill, knowledge. |
| kirtill, skirt. | set, suited. |
| lasit, fastened. | sickernes, security. |
| lesum, lawful. | suld, should. |
| lufe, love. | tepat, tippet. |
| mailyheis, eyelet-holes. | tholl, withstand. |
| pansing, thought. | weit, rain. |
A MAY MORNING.
By WILLIAM DUNBAR.
Quhen Merche wes with variand windis past
And Appryle had, with her silver schouris,
Tane leif at Nature with ane orient blast,
And lusty May, that muddir is of flouris,
Had maid the birdis to begyn thair houris
Amang the tendir odouris reid and quhyt,
Quhois armony to heir it wes delyt:
In bed at morrow, sleiping as I lay,
Me thocht Aurora, with hir cristall ene
In at the window lukit by the day,
And halsit me, with visage paill and grene;
On quhois hand a lark sang fro the splene,
Awalk, luvaris, out of your slomering
Sé hou the lusty morrow dois up spring.