Ponit in ambiguum que sit mundana voluptas,
Et fore dat certum pena quod omnis adest,
Pena quidem baratri, dolor omnis quo vegetabit,
Quo semper moritur, nec valet ipse mori.
Non vox vlla valet miseras edicere penas,
Quorum tormenta languida fine carent:
Hinc timor atque tremor, labor et dolor inde sequetur,
Perpetue pene mors furit absque mori:
Iugi morte mori, seu iugi viuere morte,
Nil differt dicas, viuere siue mori.1040