"We, perceaving how Sathan in his memberis, the Antichristis of our tyme, cruelly doeth rage, seaking to dounethring and to destroy the Evangell of Christ, and his Congregatioun, aught, according to our bonden deuitie, to stryve in our Maisteris caus, evin unto the death, being certane of the victorie in him. The quhilk our dewitie being weall considdered, We do promesse befoir the Majestie of God, and his congregatioun, that we (be his grace,) shall with all diligence continually apply our hole power, substance, and our verray lyves, to manteane, sett fordward, and establish the most blessed word of God and his Congregatioun; and shall laubour at our possibilitie to have faythfull Ministeris purely and trewlie to minister Christis Evangell and Sacramentes to his people. We shall manteane thame, nuriss thame, and defend thame, the haill congregatioun of Christ, and everie membour thairof, at our haill poweris and waring of our lyves, against Sathan, and all wicked power that does intend tyranny or truble against the foirsaid congregatioun. Onto the quhilk holy woord and congregatioun we do joyne us, and also dois forsaike and renunce the congregatioun of Sathan, with all the superstitious abominatioun and idolatrie thareof: And moreover, shall declare our selfis manifestlie ennemies thairto, be this oure faithfull promesse befoir God, testifeid to his Congregatioun, be our subscriptionis at thir presentis:—
"At Edinburgh, the thrid day of December, the year of God Jm. Vc. fyfty sevin yearis: God called to witnesse.[702]
(Sic subscribitur,)
A. Erle of Ergile.
Glencarne.
Morton.
Archibald Lord of Lorne.
Johnne Erskyne of Doun.[703]
Et cetera.
THE THIRD VOCATIOUN OF JOHNE KNOX BY THE LORDIS AND CHURCHE OF SCOTLAND.
Befoir a litill that this Band was subscryved, by the foirwrittin and many otheris, letteris war direct agane to Johne Knox fra the said Lordis, togitther with thare letteris to Maister Calvin, craving of him, that by his authoritie he wold command the said Johne anes agane to visit thame. These letteris war delivered by the handis of Maister Johne Gray,[704] in the moneth of November, the yeir of God Jm. Vc. fyfty awght, who at that same tyme past to Rome for expeditioun of the bowes[705] of Ross to Maister Henry Sinclare.[706]
Immediatlie after the subscriptioun of this foirsaid Band, the Lordis and Barons professing Christ Jesus, conveined frequentlie in counsall; in the which these Headis war concluded:—
First, It is thought expedient, devised, and ordeaned, that in all parochines of this Realme the Commoun Prayeris[707] be redd owklie on Sounday, and other festuall dayis, publictlie in the Paroche Kirkis, with the Lessonis of the New and Old Testament, conforme to the ordour of the Book of Common Prayeris: And yf the curattis of the parochynes be qualified, to cause thame to reid the samyn; and yf thei be nott, or yf thei refuise, that the maist qualifeid in the parish use and read the same.
Secoundly, It is thought necessare, that doctrin, preacheing, and interpretatioun of Scriptures be had and used privatlie in qwyet houssis, without great conventionis of the people tharto, whill afterward that God move the Prince to grant publict preacheing be faithfull and trew ministeris.