¶ The fawrith cotarmure of the chefe blode yif he dye with owte ony vsshew the hole cotarmure is lost than it fallith to be a cotarmure of thymperfite beryng with a differans
¶ Aƚƚ the bastardis of aƚƚ cotarmuris shaƚƚ bere a fesse Sū caƚƚ hit a baston̄ of oon of the .iiij. dignites of colouris. excepte the bastarde of the fixiales and the bastarde of the brethyrne of the cheue blode where theritaunce is deparded to eu̇ych brothir e like moch theys bastardis shaƚƚ adde more bagy to his armys or take a way a bagy of armys
Note here well who shall gẏue cotarmures
¶ Ther shaƚƚ none of the .ix. orduris of regalite bot aƚƚ onli the soueregne Kyng geue cootarmur. for that is to hym improperid bi lawe of armys. And yit the kyng shaƚƚ nott make a knyght with owte a cootarmure by fore.
Eu̇y knyght cheftayn ī the felde mai make a cootarmur knight
In how manẏ places a knẏght maẏ be made
A Knyght is made in .v. dyuerse placis In musturing in londe of werris. In Semblyng vnder baneris. In listys of the bath And at the sepulcur
¶ A lassed cotarmure is on the moderis parte
¶ A lassed cootarmure is calde the coote of a gentylwoman hauyng lyuelode weddyd to a man hauyng noo cootarmure. hir sone may were hir cootarmur with a differance of armys duryng his liue by the curtesy of law of armys. and his sone shaƚƚ none bere bot so be that the gentylwoman be heyr or next of blode to that cootarmure. Or ellis beyng hir byrth of the blode Royaƚƚ and than shaƚƚ hir heyre bere hir cootarmure