Sufficientli is spokyn of crossis afore. now folowis an odir treteys of dyuerse armys quarteryt as here shaƚƚ be shewyt.
Off armys quarterit sum ar armis quarterit playn Sum quarterit engradit. Sum quarterit irrasit. Sum quarterit inueckyt. Sum quarterit indentit of the wich it shaƚƚ be spokyn euerich oon after other. and first of tharmys playn
Itt shaƚƚ be shewyd first of armys quarterit playn.
Thre maner of wyse armys may be quarterit. The first maner is opyn whan .ij. dyuerse armys ar borne quarterli as it is opyn and playn in tharmys of the kyng of Fraunce & of Englond And ye shaƚƚ say of hym yt beris theys armys thus as folowys. first ī latyn. Ille portat arma regis Francie & Anglie qurteriata. Et gallice sic. ¶ Il Port lez armes de Francee et dangleterre quarteles. Anglice sic. ¶ He beris tharmys of France & Englonde quarterli. And it shaƚƚ not be tedeus to no man that Fraunce is put before Englonde ī blasyng. bot the cause is this. for tharm̄ys of Fraunce in armys be put afore and we haue a gen̄aƚƚ rule yt whensumeu̇ in armys be .ij. colouris or moo ī the poynt of the shelde. then ye shaƚƚ not begyn at the poynt to blase them. bot in the right ꝑte or side of thos armys. that same coloure ther founde ī the right side of ye shelde is not the felde of tharmis. for it mai fortune it is not the gretist coloure ī tharmys aforsayd bot les or with othir equaƚƚ. and neu̇ the les ye shaƚƚ begyn to blase ther.
Off armys quartly borne now it shaƚƚ be shewyd.
The secūde maner of wyse of beryng quarterit armys is when .iiij. diu̇se armys quartli be borne as here is shewyt And he that beris theys armys: beris .iiij. diu̇se armys quartli. latine sic. Ille portat quatuor arma diu̇sa quartiata. Gallice sic.
¶ Il port quarter armes diu̇sez quarteleez. Anglice sic He berith .iiij. armys diu̇se quartli. And then if it be askyt how theys armys shulde be blasit. The blaser most begyn ī the heyst corneƚƚ ou̇ the right side ꝓcedyng to eu̇y armys. tharmys in the right side blasit: ye most go to the odir side & then to the thirde side & afṫ to the last. And ye most know that theys armys rehersit afore be playn armys quarterit.
Ther is an othir man̄ of beryng of armys quarṫit when ij armis quarterit be borne quart̄li. and it is borne most ī armis of quenys and so bare that noble quene of Englond quene Anna wyfe to that royaƚƚ prince Kyng Richard the secunde: the wiche bare tharmes of Englond &̄ of Fraunce and of themꝑor of Almayn quarṫli & in .xvi. ꝑtes. that is to say in the right side of the shelde in the first quarter she bare tharmys of fraunce .iij. floredelucis of golde ī a felde of asure. & ī the secunde quarṫ .iij Libartis of golde ī a felde of gowles. & ī ye thirde quarṫ an Egle splayd wt .ij. neckis. & ī the .iiij. a blake Lyon rampyng ī a felde of Silu̇. and so chaungeably she bare theys armys in .xvi. quarteris the wich seldyn is seen in any armys.
¶ Off armys quarterit and engraylyt now shaƚƚ be shewytt
