Also other while ar borne armys masculatit as here now in this figure folowyng is shewyt. And ye shaƚƚ vnderstande that thos armys be calde masculatit in the wich the forsayd mascules begyn most plentuysly in the right angle of the shelde. and ar endid towarde the lefte ꝑte. the wich certan armys in u̇y deed ar palit. & ar deuydit ī to .iij. palys yf thei be subtile consayuyt. And of hym that beris theys armys it shaƚƚ be sayd ī this wyse first in latyn. Portat arma masculata de argento & asorio. Et gallice sic Il port dargent et dasor masculee. Et anglice sic. ¶ He berith of Siluer and asure masculatit.
Off losyngys how and what maner of wyse they be made.
Also losyngye no maner of wyse be made bot ī armys bendit. ner they may not be made by ther selfe. and they be made aƚƚ way as theys be made bendit. And ye shaƚƚ haue the moost verey differans by twix the forsayd masculatit armys and bendid in the picturis of the forsayd armys. And ye most take thys for a generaƚƚ enformacion and instruccion thatt certanli losyngꝭ eu̇more stande vpright: that is to say that the heyst poynt or the heght: eu̇ ascendis to heuen or to a mannys heed. so that the heyst poynt extendys vttirly to the heed of the shelde. and of the ouerwart corneris oon extendis vtterly to the right side. and that other corner extendys to the lefte side of the shelde. and the lawist parte extendys to the lawist parte of the shelde dyametraliṫ as it is opyn in the shelde next a fore. And so with owte dowte we haue the differans of the forsayd signes. that is to wete of Mascules and Losynges. Nota also the forsayd fusyllis neuer be founde ꝑforatit ner losyngys afore sayd be neu̇ ꝑforatit.
Now of a signe ī armis yt is calde a Saltori a maṅ of a cros
Ther is an other maner of signe in armys: by dyu̇se nobuƚƚ men borne: the wich is calde a Saltori. and it is made by the maṅ of a cros of Sayntandrew as here now it apperith. And thys cros is lickynt after certan men to an instrument made in dyuerse parkys the wich is of a grete magnytude or largenes: to the comparison of thys signe. And it is weƚƚ know of nobuƚƚ gentelmen and huntteris that sych saltatories ar ordant in mony parkys & plaas to take wilde beestys the wich onys their enteryng: by thatt instrumente may neu̇ goo a gayn. Wherfore in olde tyme thes signys were geuyn to rich men. and otherwyse calde auaris Nygonys or keperis the wich men suffir not their tresures ī what maner of wyse they be getyn: to passe from theym. And of hym the wich possessis theys armys ye shaƚƚ say in latyn. Portat de asorio et vnum saltatorium de auro. Et gallice sic. Il port dasor vng saultiere dor. Et anglice sic. ¶ He berith asure and a Saltory or a sawtri of golde.
Off armys sawtrie engradit here I wiƚƚ exempliƚƚ.
